Togu ma Rohanta di bagasan Tuhan i - Jamita Partangiangan (Efesus 6 : 10 – 20)

 

Jamita Partangiangan
04 September 2024

Evangelium : Efesus 6 : 10 – 20

Patujolo : Angka dongan sahaporseaon, adong do hata na mandok “Hidup Ini adalah perjuangan”. Di turpuk jamita di borngin on, sasintongna on do na naeng dohonon ni Debata tu hita bahwa ganup angka na porsea di Tuhan Jesus Kristus, saleleng mangolu di portibi on ingkon do berjuang mangalo saluhut angka ihot ihot ni portibi on, manang na angka pangago na di portibi on ima harajaon ni sibolis. Molo tabereng do angka na masa di Film taringot tu angka parporangan, sude do angka penguasa manang na Raja paborhathon angka pasukanna be marhite angka senjata laho manaluhon angka alona nasida. Alani hita pe sasintongna di paborhat Debata do hita tu portibi on laho manaluhon haholomon i (harajaon ni sibolis) marhite angka senjata na pinarade ni Debata. Alani marhite jamita di borngin on di paingot Debata do hita asa :

Thema  : “Togu ma Rohanta di bagasan Tuhan i”

1.     Ai gogo do portibi on na laho pataluhon haporseaon ta

Molo marningot do hita di padan na robi, di tingki na madabu si Adam dohot si hawa tu bagasan dosa dison ma patar di paboa tu saluhut pangisi ni portibi on, bahwa margogo do sibolis mangarajai, mangela-ela angka pingkiran ni saluhut hita jolma, jala on ma namasa sahat tu nuaeng, ido umbahen asa torop hita jala si ganup tingki madabu tu bagasan dosa, siganup ari do saluhut jolma madabu tu bagasan dosa, godang na mangalehon dirina di pangke sibolis gabe mangula angka hajahaton, manghanciti roha, mangaleai, paroa roahon, marlate ni roha nang songoni ginjang ni roha, godang na mangalelei angka parbarita nauli, manundati manang na paporsuk porsuk hon angka na pauli uli bagas joro, jala na paroa roahon manang na palea leahon angka parbarita nauli, angka on ma ulaon ni sibolis di na masa sahat tu tingki on, jala na paling nyata di ngolunta on ima mambahen hita ndang marpos ni roha tu Debata (paholangkon hita sian Debata).

Jala sasintongna ia disi tapajonok dirinta tu Debata laos disi do jongjong sibolis i mangganggu roha nang pingkiranta na mambahen hita gabe hurang marpos ni roha tu Debata. Boi do tarasahon i, saleleng holang hita sian Debata olo do denggan-denggan sajo torus pardalanan ni ngolunta.alai dung tapajonok dirinta tu Debata disi ma olo gok masa angka parungkilan manang na tantangan. Tung mansai gogo do sibolis i sasintongna manggugai roha ni ganup angka na porsea, jala Jesus sandiri pe di unjuni sibolis do, alai ala di Jesus do saluhut huaso na sian Debata, talu do sibolis i dibahen Jesus Kristus. Jala sasintongna hita pe margogo do laho manaluhon huaso ni sibolis, margogo do hita manaluhon saluhut angka hisap hisap ni portibi on asal ma tongtong togu Rohanta  di bagasan Tuhan i songon thema ni jamita ta di borngin on na mandok “Togu ma rohanta dibagasan Tuhan i”  

2.     Asa margogo hita manaluhon saluhut angka tahi ni sibolis.

Di na tabereng nuaeng angka namasa di portibi on, sasintongna ingkon do sude hita pajonokhon diri tu Debata, ai Debata sandiri do mandok ndang tarulahon hita saluhut angka na denggan ianggo so marhite hite Debata (Yoh.15:5-6). Mangulahon na denggan pe hita maol do ianggo so marhite hite holong na sian Debata, isarana mengmapuni angka musunta, manghaholongi angka dongan ta, manghaholongi saluhut pangisi ni bagasta lumobi ma manghaholongi Debata di bagasan pos ni roha, sada hal na borat situtu do i ulahononta molo so hot hita di hata ni Debata, lumobi ma muse laho manaluhon saluhut angka dosa manang na mangalo saluhut angka tahi ni sibolis na mambahen hita madabu tu dosa ndang tartaluhon hita i ianggo so marhite huaso dohot gogo na sian Debata. Di turpuk jamita borngin on di ayat 17 didok do asa sude hita manjangkon hata ni Debata ima na gabe tahulukta (Topi) dohot podang ta laho mangalo saluhuta angka tahi ni sibolis i. Jala songon na nidok ni angka na Porsea didok do bahwa “Tangiang do gogo ni angka na porsea” songon na nidok na di ayat 18 ai ingkon tangkas do tahaporseai jala ta antusi bahwa tangiang ido parhitean ta tu Debata laho mangido gogo dohot huaso sian Debata asa margogo hita manaluhon saluhut angka tahi ni sibolis, alani unang losok jala malas hita martangiang alai tongtong ma tagogohon manjouhon goar ni Tuhan Debata.

Alani angka dongan sahaporseaon, molo pe tung gogo sibolis i na sai tongtong manggugai roha nang pingkiranta lumobi ma haporseaonta, jala molo pe tung porsuk sitaononta di portibi on, ta ingot ma gomos bahwa portibi on nungga be talu di bahen huaso ni Debata marhite hite haheheon ni Jesus Kristus sian hamatean i (Yoh.16:33) na marlapatan ma i molo Debata do dongan ta jala tongtong hot rohanta di bagasan panoguion ni Debata, dang adong be alonta (Rom.8:31+39) jala tontong do donganion jala parsahalaion ni Debata hita mangalo saluhut angka tahi ni sibolis i marhite tondi porbadia. Di bahen i tajalo jala tapangke ma angka sinjata haluaon naung ni lehon ni Debata tu hita, asa margogo hita jala boi tataluhon saluhut tahi ni angka sibolis i. Asa di na di lehon Debata dope hosa hangoluaon i dihita tutu ma hita hot di bagasan roha na tigor maradophon Debata.

Di pasu pasu jala di pargogoi Tuhan Debata ma hita saluhutna. Amen.