Jamita Minggu, 19 Oktober 2025.
Evangelium : LUKAS 18:1-8
Patujolo
Dipardalanan ni ngolu di ganup angka na porsea tontu ianggo angka parungkilon nang sitaonon ingkon adong do, jala ndang tarpasiding hita i asa uas ngolunta sian angka sitaonon. Alani di ganup angka sitaonon i, tangkas do do tahaporseai di Suanhon Debata do haporsean di ganup angka naung manjalo asi ni roha marhite pandidion, nang di ulaon na badi, jala tarida ma i di tjngki na marsitaonon hita Di togu Debata do hita marhite tangiang Jala di ganup angka tangiangta adong do saat-saat hita merasa bahwa dang maralus tangiangta, seolah-olah sip Debata, dang parduli tu hita. Hinorhon ni i, olo do sipata gabe malas, so hita martangiang, mago panghirimon, jala jotjot tapatudos martangiang so martangiang sarupa do tong inna rohanta. Alai dibagasan jamita on, Tuhanta Jesus Kristus mangalehon umpama hombar tu namasa di pardalan ni ngolunta. Ditaringoti Tuhan Jesus di umpama na i, sahalak nabalu na torus ro mangido pamintorion maradophon musuna tu panguhum nageduk i, panguhum na so mabiar tu Debata do ibana jala dang mamparsangapi donganna jolma. Marhite jamita on, naeng ajaran ni Tuhanta i hita;
Tema: *Manontong ma hita martangiang*
*I. Unang Ma Lemba*
Sahalak namabalu dison digombarhon do na gale, na so adong gogona mangalo musuna i, holan panguhum i nama naboe natuk paluahon ibana jala namangalehon keadilan tu ibana. Hape panguhum i pe panguhum naso marhabiaran mida Debata nang naso parduli tu jolma. Panguhum i ma gombaran sian ketidakpedulian dohot pir ni roha. Alai namabalu on dang menyerah mangido tu panguhum i, torus ro ibana mangido pamintorion maradophon musuna. Dungi menyerah do panguhum i alani natorus ro ibana mangido.
Tuhan Jesus mamangke umpama on sasintongna laho paingothon hita do. Ai diboto Tuhanta i do hita jotjot lemba martangiang. Martangiang sahali, dua hali, tolu hali dungi mantak martangiang. Sai tadok ma dang dialusi Tuhan i tangianghu. Amang/inang, jotjot do hita molo dang maralus tangiangta, gabe lao do panombusanta mangalului solusi na asing diluar ni hagogoon ni Debata, gabe marhaposan tu gogo do hita dohot bisuk ni portibi on. Mangasahon hagogoon ni jolma dohot portibion sasintongna bentuk penolakan do i di haporseaon tu Tuhan i ujung-ujungna gabe pir rohanta, lemba rohanta lao martangiang. Hata ni Debata mandok, sadarion molo dibege ho soara-Na, unang ma pir roham (Heber 3:15).
Pirniroha dang na holan nasomarpangolo i, alai dohot do dang porsea. Molo so hita martangiang, namandok Tuhan i dang peduli tu au, dang marhuaso Tuhan i. Gabe tajongkalali Tuhan i, jala dosa na fatal do i amng/inang.
Hita huria ni Tuhanta, ingkon tasadari do na jotjot hita lemba, papirhon roha, alani ringkot do hita paubahon roha.
*II. Ai Ditangihon Debata do Pangidoanta*
Dung tabereng nangkingan ketekunan ni namabalu i dohot ketidakadilan ni panguhum nageduk i. Diapuli Tuhanta Jesus do hita, Lukas 18:7: Ia Debata, tung so pintoranna ma angka na pinillitna, angka na manjou Ibana arian dohot borngin? Tung pangerngeronna ma di nasida?. Naeng dohonon ni Tuhanta i tu hita, dang sarupa Debata dohot panguhum nageduk i. Debata i ma Ama na gok asi ni roha na tontong manangihon tangiang manang pangidoanta. Dibagasan Tuhan Jesus, adong do jaminan tangiangta i dang holan ditangihon alai dohot do maralus. Bereng ma silang ni Tuhanta Jesus, i ma bukti holong ni rohaNa tu hita, dang dipasombu hita marsitaonon. Tuat do Ibana tu portibion, manuhuk dosa dohot sitaononta, asa tarbahen hita ro tu Ibana. Jesus sandiri do teladan tangiang namanontong i. Ibana martangiang di Getsemani, ibana manjou-jou di hau pinorsilang, jala Ibana do malim/ parhiteanta diadopan ni Ama i. Ditingki martangiang hita, dang na ro hita marhite gogonta sandiri, alai dibagasan goar ni Tuhan Jesus na mamungka dalan tu hita.
Di Hurianta GKLI, porsea do hita bahwa haluaon i, silehon-lehon ni Debata sambing do i, ndada alani gogonta. Songoni nang alus ni tangiang i, ndada alani ringgasta sambing i, alai ala asi ni roha ni Debata! Haringgason martangiang dang na laho mambuat roha ni Debata hita, alai lao pasadahon rohanta dohot lomo ni roha-Na. Amang/inang, dang dao Tuhanta i! Ai jonok do Ibana, Debata na hadir do Ibana laho tumangihon tangiangta. Molo ro hita manjou Ibana, dang namanghatai hita tu alogo alai tu Debata namangolu i do, nagok asi ni roha i. Ditangihon do sude angka parungkilonta, lungun ni rohanta nang rohanta na malalai.
*III. Alani Manontong Ma Hita Martangiang*
Marumpama pe Tuhan Jesus dison, asa paboahon tu hita do asa manontong martangiang, unang lemba i do lapatanna. Alani do responta di asi ni roha ni Tuhan i, i ma ingkon mangolu dibagasan tangiang. Unang baen beban namartangiang, alai ingkon do sebagai kebutuhan na ringkot di hita halak naporsea. Jala on do pataridahon parsaoranta dohot Tuhan i, na ringkot do hita di asi ni rohaNa. Martangiang pe hita ndada alani nagogo hita, alai jolma na gale do hita. Tangiang i do hosa ni haporseaonta. Marhite tangiang do pajumpang hita dohot Debata namangolu i. Molo so ro dope alus ni tangiangta, molo ro pe angka sitaoonon i, unang ma gabe mansohot hita martangiang. Alani do ingkon taingot umpama nangkingan, dang hea Debata lalai, Debata namarpanangi do Ibana, peludi jala bertindak. Unang loas ganggu ni roham papirhon roham alai ro ma hita tu Debata dibagasan haporseaon dohot panghirimon namangolu. Sahalina i, unang ma loas kekecewaan dohot sitaononta i mambaen hita mandao sian Debata, ingotma ditangihon Debata do tangiangta, ai dang sarupa ibana tu panguhum na geduk i, Ibana do Debata na gok asi ni roha, namangalehon Anakna Jesus Kristus humonghop hita. Alani manontong ma hita martangiang, nang dibagasan las niroha dohot arsak pe. Tangiang ndada alani bagak ni rangkaian hata-hatanta alai roha i do. Ingot ma ditingki na martangiang hita, ndang sahalakta disi, ai rap do Tuhan Jesus dohot hita. Tondi Porbadia margogoihon hita, Ama i managihon hita.
Amen.
