I.
Evangelium (Matius 18 : 21 – 35)
Thema : SAI MANONGTONG MA HITA MARSIMAAPAN SAMA HITA
SONGON NA BINAHEN NI JESUS TU HITA
I.
Nang pe pardosa hita alai di maaphon
Debata
Ama
nami ina nami dohot sude dongan sahaporseaon, molo ta ingot do jamitanta di minggu
naung salpu, minggu XIV Dung trinitatis, nunga di ajari Jesus hita marhite
hataNa, na ingkon mian do saluhutna hita di bagasan holong na sintong, ima
holong na patoruhon diri di adopan ni Debata – songoni ma nang taringot tu
ruhut ni paminsangion, lumobi ma tahe taringot tu na manesa sala ni angka dongan.
Alani
i, tabereng ma muse di turpuk jamita sadari on, umbahen na di ajari Jesus
nasida taringot tu na ingkon marsimaapan, ro do si Simon Petrus tu Jesus marsukkun
na mandok “Tuhan, sintap ni piga hali do sesaonku dosa ni dongan hu ?, pola do
pitu hali ?
Ia,
molo bagas hita mangalapati turpuk jamita on, sintongna sukkun sukkun ni si simon
petrus on ma na mewakili sude bangko ni hita jolma. Molo ukuran di hajolmaon, 1
hali-2 hali tu-3 hali do batas na jotjotan tapakke, alai di turpuk on sukkun
sukkun ni si sean i, pitu hali ninna.
Alani
memang di hasiangan on, tung jotjot do hita mambahen batasan jala hitung
hitungan taringot tu na mengampuni songoni ma nang taringot tu holong
marsihaholongan.
Alani
i, aha do maksud ni Jesus na mambahen alusna na mandok “ndada pitu hali
dohononku tu ho, tung sintap ni pitupulu hali pitu do” lapatanna naeng dohonon
ni Jesus do tu siseanNai songoni ma nang dihita saluhutna, ianggo taringot tu
na mengmapuni ndang adong Batasan, saleleng di lehon Debata dihita hosa
hangoluan i, na ingkon songoni do mangolu di hita holong na denggan na ingkon
marsimaapan sahat tu na sae hosanta.
Molo
tapatudos do tu perumpamaan na binahen ni Jesus di turpuk ta on, di bahen Jesus
do umpama taringot tu sahalak na marutang 10.000 talenta (ayt 24), ia molo 1
talenta sasintongna tudos ma i tu 6.000 dinar jala tudos ma i nang tu upah
harian buruh sadari manipat. Alani i, molo tabahen do kalkulasi ni si 10.000 talenta
on gabe tu penggajian harian tudos ma on tu 60.000.000 hari kerja. Alani i, aha
do tujuan ni Jesus mambahen umpama on ?
Na
parjolo memang sude hita jolma ingkon sadar do, sude do jolma pardosa di adopan
ni Debata songon na nidokna di hataNa. Jala dosa i, utang to do i na gabe
marujung tu hamatean. Alani i do, sasintongna tujuan utama ni Jesus mambahen
umpama i, asa ta boto jala ta solsoli do sude dosa na tabahen maradophon Debata
ndang taretong hita, jala mustahil do hita boi mambayar sude dosanta i lunas
marhite pambahenan, nang gogonta sandiri nang tingkitta.
Alai,
tabereng ma di umpama i, tung mansai patar do asi ni roha ni raja i na
manggambarhon Debata maradophon hita molo unduk rohanta mangido asi ni rohaNa –
na tupa do tarsesa sude dosanta manang na lunas do sude utang ta i marhite asi
ni rohaNa.
Ala
ni i, aha do hubungan ni umpama on taringot tu jamita mengampuni manang na
pangarimpunan ni Jamitanta sadari on ?
Ganup
angka naung sintong di adopan ni Debata, ima hita angka naung tinobusna sian utang
dosa hamatean i, sasintongna nian ingkon olo do hita mamelehon ngolunta mian di
bagasan pengampunan maradophon saluhut dongan ta jolma. Molo ta ingot do dosanta ta manang utangta nagodang
i di ampuni Debata, hita pe ingkon olo do mardame manang na mengampuni sude angka
donganta jolma lumobi ma di keluarganta na berselisih alani angka kesalahan manang
na dosa na gelleng. Jala marhite turpuk jamita on, dohonon ma tu hita saluhutna
“ia jolma naso olo mengampuni angka donganna, manang na menolak permintaan maaf
ni donganna, sintongna hita ma angka naso manghaporseai, jala naso mang argahon
asi ni roha ni Debata naung mangampuni hita. Jala tudos ma i songon umpama nakkin,
gabe tarrimas muse raja i, manang na Debata molo ndang olo hita marsimaapan
(30).
II.
Alani ingkon marasi ni roha ma nang hita
tu sude donganta jolma
Molo ta ingot do umpama nakkin, sahalak
naung pinalua ni raja i sian utangna lupa do ibana di asi ni roha ni raja i na
tu Imana hian, siala di namanipat marutang donganna 100 dinar, pintor di
hurungkon ibana do, ala so digarar utang na i, nang pe nunga mangelek parutang
i.
Umpama on, sasintongna gombaran do on
taringot tu holong ni Kristus na paluahon hita marhite asi ni rohaNa nang bangko
ni hita jolma, ima angka jolma na jotjot tardapot ndang tau mandok mauliate tu
Debata di asi ni rohaNa, jala naso porsea di panogu-noguon ni Debata.
Alani songon di bagian na paduahon on
di ondolhon tu hita saluhutna “ingkon gabe jolma paras ni roha do hita
saluhutna – siala naung tajalo asi ni roha na sian Debata”.
Marhite turpuk jamita on, ringkot do
nang hita marsiajar di poda na sintong hombar tu jamita on, lapatanna molo marasi
ni roha pe hita maradophon donganta jolma, manang na olo pe hita mengampuni
angka donganta ndang na gabe i syarat asa sintong hita di adopan i Debata,
lumobi ma asa gabe masuk surgo, alai sintongna Haporseaon na togu marhaposan tu
Debata jahowa ingkon mian do dibagasan roha mauliate tu Tuhan Debata marhite na
marholong ni roha tu dongan jolma.
Alani i, tantangan na muse di hita di
hasiangan on, molo didok mengampuni ndang mura nian, jala jotojot do borat
ulahononta on di ngolunta ala ta ingot pardalanan naso denggan. Alai marhite
jamita dihita sadari on, dipaingot tu hita saluhutna asa molo mengampuni angka
donganta jolma hita unang ma mangasahon panggora ni roha sambing, alai jumolo
ma nian hita mamereng tu silang ni Kristus i na gabe dalan ni Debata laho mangampuni
hita jala mambahen hita malua sian utang ni dosa hamatean.
Olo ma hita mengampuni angka donganta
marhite na mangasahon asi ni roha na sian Debata, tapatudu ma ngolunta naung
malua sian paet ni parmusuon dohot kebencian ala ni dosa, siala nunga malua
jala dihokkop Debata hita marhite asi ni rohaNa nab alga i.
Amen.
