Minggu Misericordias Domini “Asi ni roha ni Tuhan/Kasih Setia Tuhan (Maz. 33:5) 1. Evangelium : Lukas 24 : 36 – 43

 

Sermon Bulan April 09/April/2024

Minggu Misericordias Domini “Asi ni roha ni Tuhan/Kasih Setia Tuhan (Maz. 33:5)

1.      Evangelium : Lukas 24 : 36 – 43

Pendahuluan : Haheheon ni Jesus Kristus sian hamatean, sasintongna sada barita nabalga doi di luat Jerusalem di tingki i, sude do jolma ndang tarjalo rohana namasa di tingki i, ndang mungkin hehe jala mulak mangolu Jesus sian hamatean di roha ni angka naso porsea di Jesus Kristus. Jala boi dohonon sian angka sisean ni Jesus i ndang apala tangkas pangkiriomon nasida taringot tu haheheon ni Jesus Kristus. Jala nuaeng pe molo ta ikuti do perkembangan teknologi di tingki on, di taon 2024 on mansai Viral do ima sada pangajarion sesat sian sahalak Pendeta bertato ima na mamboanhon Kristen Progresif, sian angka pangajarionna mandok ndang apala ringkot hamamate ni Jesus Kristus, jala sian sumber situs ibana mandok di ujung na ingkon masa do annon godang kareta namanaruhon sude angka jolma laho mandapothon Jesus Kristus. Artina lam matua Portibi on lam torop do angka jolma naso porsea di haheheon ni Jesus Kristus nang songoni angka pangajari na naeng pamagohon barita taringot tu Jesus Kristus, Alani marhite minggu Misericordias domini “Asi Ni roha ni Tuha I” di paingot Debata do hita asa :

Thema : Porsea ma hita Nunga  Hehe Jesus mamboan Hadameon. (Yesus Kristus bangkit membawa Damai)

1.      Alani unang marganggu ni roha hita “low”            **Jangan Ragu**

Dongan sahaporseaon di bagasan Jesus Kristus, sasintongna barita taringot tu haheheon ni Jesus Kristus  nunga mansai torang di pabotohon Jesus tu angka sisean i(Mat.26:1-2), ingkon do mate Ibana jala hehe sian hamatean. alai sian pardalanan hamatean ni Jesus sahat tu haheheon nai ndang adong nasida na porsea jala mangkirim ingkon hehe Jesus sian hamatean. Ido asa molo tabereng di turpuk on sasintongna nunga di patudu Jesus dirina tu si Kleopas nang donganna, ima di na mardalan nasida laho tu huta Emmaus, rap do nasida marcerita sambil mardalan dohot Jesus alai ndang di tanda nasida Jesus dongan nasida na mardalan i ia so dung di pasu pasu Jesus roti i (Luk.24:30). Jala di turpuk jamita sadari on ido di ceritahon sama nasida tu angka sisean na debanai, jala di na marcerita i nasida ro ma Jesus jonjong di tonga tonga nasida. Memang molo tabayangkon “sian haroro ni Jesus na toppu i jongjong di tonga tonga nasida tontu sahali olo do tarsonggot, alana toppu tor jongjong di tonga tonga nasida naung bagas borngin jala pintu ni bagas nasida nunga sordak di tingki i(Yoh.20:19). Alai sada hal na porlu antusanta, nang pe nunga di jolo nasida Jesus i jongjong ndang mananda nasida di Jesus Kristus i, nang pe nunga dipatudu Jesus i tangan nang pat na alai laos so porsea do angka sisean i bahwa na toho do Jesus na jongjong di jolo nasidai(41). Gogo ni habiaron na di portibi on boi do mambahen hita ndang mananda di Jesus, ndang mananda di denggan basa nang pandonganion ni Jesus.

 

Molo ta ingot do jamita minggutta di minggu naung salpu (Quasimodogeniti) sahalak sian sisean i na margoar si tomas, maol do ibana manghaporseai taringot tu haheheon ni Jesus Kristus sian hamatean, ido asa didok ibana ianggo so hu surdukkon jari jaringku tu bongkas ni pamakuan i, ndang porsea au naung hehe Jesus i. Artina sian angka panandaion nang pangkirimon dohot haporseaon ni sude sisean i, ingkon do dohonon marhite jamita on “naso tarbahen hita hajolmaon manghaporseai Jesus lumobima taringot tu haheheon nai ianggo marhite pingkiran nang hagogoonta sandiri alai ingkon do Debata na manuturi hita jala tondi Porbadia i na mangajari asa boi ta antusi denggan basa ni Debata(Luk.24:45) bandingkan dengan makna Pengakuan Iman Rasuli.

 

Alani unang be nian sala motivasitta di na taihuthon Tuhan Jesus songon angka sisean i “holan mangkirim di haluaon manang na hasonangon di portibi on sambing manangna pembebasan sian angka panggomgomi(Luk.24:21). Unang holan mamikkirhon na ringkot di portibion hita asa taingot Jesus Kristus(1 Kor.15:19).  Unang be songon angka sisean i hita, maol manghaporseai angka na pinasahat ni Jesus Kristus, Maol marningot jala mananda di angka naung pinamasa ni Jesus di tingki na melayani nasida rap dohot Jesus. Alai ingkon do antus hita di panandaion na sintong, Jesus mate di hau pinorsilang i holan alani dosanta, jala mulak mangolu Ibana sian hamatean i laho patandahon hamonangan jala mangalehon Hangouan tu hita ganup na porsea di Ibana. Ingkon do tatanda denggan basa ni Debata tu hita songon goar ni minggutta sadari on “Misericordias Domini” saluhut pergerakan manang na panggulmit ni ngolutta on holan asi ni roha ni Debata do i, lumobi ma Haluaon “Surgo” holan asi ni roha do i di lehon tu hita ganup angka na porsea di ibana(Rom.3:28). Alani ndang tama hita marganggu ni roha – Alai Pos ma rohanta di Debata.

 

2.      Ai di pamonang do hita jala di lehon Hadameon.

Dongan sahaporseaon, sada denggan basa ni Debata naso tartuhor jala tarbalos hita jolma tu Debata ima Dame (Asi ni roha) na pinatupa ni Debata tu hita Jolma. Jesus ro tu portibi on sasintongna holan lao mangalehon dalan haluaon/hadameon do tu hita jolma(Joh.14:6).

 

Molo tajaha do di sude kitab sinoptis tingkos do di hatindangkon marhite hamonangan ni Jesus manaluhon dosa hamatean i “Dame do di pasahat Jesus tu saluhut angka sisean nai” (Luk.24:3). Artinya sudah kepastian bahwa Hamamate ni Jesus di hau pinorsilang sada dalan nauli na denggan doi naung di sangkapi Debata asa sahat Dame i tu ganup angka na porsea di Debata. Alai jotjot do jolma ndang mananda di asi ni roha ni Debata. Torop do jolma na sala mangantusi di hadameon naung pinatupa ni Jesus Kristus. Hamonangan na pinnatupa ni Jesus Kristus ima marhite na manaluhon dosa hamatean i, sasingtongna dison ma naeng ingkon tandaonta bahwa haheheon ni Jesus Kristus i mamboan hadameon di hita ganup angka na porsea di Ibana. Sude jolma na porsea jala mangolu di bagasan pangkirimon na sintong angka ido naung mardame dohot Debata. Jala holan angka na porsea/naung mardenggan dohot Debata do na tau manjalo hadameon.

 

Saleleng mangolu hita di portibi on, portibi on pe sasintongna boi do mangalehon ima na nidokna hadameon. Jala olo do alani hadameon na di tawarhon portibion gabe lupa jala dang mananda hita di Dame naung pinatupa ni Jesus Kristus. Hadameon na boi lehonon ni portibi on isarana ima angka hamoraon, arta, kejayaan, Kekuasaan dohot angka lan na asing hombar tu kenikmatan ni portibi on “alai porlu do antusanta hadaemon na ni lehon ni portibi on bersifat sementara do i/na lao salpu do sude nai”. Alani naeng do ingkon anntusanta Hadameon na paling dumenggan sian saluhut dame na di portibion ima Dame naung pinarade ni Debata “Haluaon ni tonditta”. Manang na Hadameon ni ganup angka na porsea di Debata namangolu di portibi on ima nanidokna marparbue na ramos hombar tu haporseaon (Hidup menjadi berkat) ima tanda ni dame na turun sian surgo i tu ganup angka naung mananda holong ni Debata. Sude do jolma mangkirim asa mandapot dame i, alai holan di angka na marpos ni roha na sintong di Jesus do na dapotan dame si saleleng ni lelengna (Surgo).

 

Alani di hita pe saluhutna, molo di namasa di turpuk on Jesus do na ro tu tonga tonga ni angka si sean i di naung hehe Jesus i. Ibana sandiri do na ro tu tonga tonga ni angka sisean na marganggu ni roha, gok biar ni roha maradophon bangos jahudi (Harajaon portibion/begu-Iblis). Jala laos di tingki on pe Jesus do na ro mangkobasi hita di parmingguan on, mangkobasi hita ganup Jolma na gok dosa, mangalehon pos ni roha di haluaon i marhite hatana na badia i. Alani naeng dohonon saluhut angka jolma na Pajupa dohot Debata ingkon do Dame Rohana, jala saluhut jolma na ro tu bagas jo ro ni Debata na pajuppa do hita dohot Debata. Alani ingkon do dame rohanta ala naung tajalo hasesaan ni dosanta nang panoguon ni haporseaon marhite hatana ai marhite hite i sahat ma Dame na sumurung i tu hita.

 

3.      Alani manongtong ma hita di bagasan Dame ni Debata.

Sada dalan na dumenggan na patut hangoluhonon ni angka jolma naung mananda di dame ni Debata (Asi ni roha) ima angka jolma na tongtong marhamubaon ni roha (Luk.24:47). Ingkon mananda diri do hita di adopan ni Debata bahwa saluhut dame i boi songgop tu hita holan asi ni roha ni Debata doi. Umbahen i, marhite naung pinasahat ni Jesus Kristus tu angka sisean i dame nai di suru nasida asa mamaritahon barita taringot tu hamubaon ni roha (Pertobatan). Na marlapatan mamaritahon taringot tu hamubaon ni roha “Magnet yang paling menarik ima hamubaon pribadi” Marisuang do di hita sandiri sai tabaritahon hamubaon ni roha ianggo dirinta sandiri ndang muba (Bertobat). Jala hata ni Debata di tingki on mangondolhon holan angka jolam na olo paubahon diri sigunup ari do na sintong mian jala mananda di dame ni Debata ima asi ni Roha. Alani marhite minggutta sadari on, anggiat nian sude hita mananda di asi ni roha ni Debata jala tahamauliatehon ma i marhite na tongtong olo hita marhamubaon ni roha nang mamaritahonsa. Amen.