Khotbah Minggu XIX Dung Trinitatis - Matius 22 : 1 – 14 - TAOLOI MA OTNDANGAN NI JESUS JALA MIAN MA HITA DIBAGASAN ASI NI ROHANA

 

1.   Khotbah Minggu XIX Dung Trinitatis

 

Evangelium : Matius 22 : 1 – 14

 Somal do molo di hita batak adong umpama ta na mandok “Gokhon do sipaimaon jala jou jou do siadopan”, ia molo songon hita na marhuta di kota batam on, boi dohonon ndang hurangan pesta be hita gariada naso taradopi hita nama sude angka adat alani waktu naso boi, keadaan dohot na asing. Jala boi dohonon molo nunga ro angka otndangan ni angka keluarga paling tidak molo so boi hita dohot ingkon sahat do amplop ta, alani do molo tapatudos do tu turpuk jamita sadari on, tutu nunga masuk hita tu minggu na pa XIX dung Trinitatis, jala jamita sadari on manaringoti taringot tu harajaon ni Debata, marhite turpuk jamita on di bahen Jesus do sada umpama taringot tu pesta unjuk, alai ndang apala sude manjangkhonsa jala sian na manjangkon i pe adong do naso sian ias ni rohana, ala ni i, boha do hita mangadopi otndangan ni Debata lumobi ma na manjalo asi ni roha haluaon i ?. Marhite turpuk jamita sadari on di podahon do tu hita marhite tema na mandok :

Thema : TAOLOI MA OTNDANGAN NI JESUS JALA MIAN MA HITA DIBAGASAN ASI NI ROHANA

1.   Unang tulak asi ni roha panjouon na i

2.   Ai diparade Debata do dihita saluhutna

3.   Asa tu hangoluan na saleleng ni lelengna hita

 

1.      Unang tulak asi ni roha panjouon na i

Molo marningot hita di bona pasogit ta be, rata rata do sude gareja mamangke giring giring, jala somalna do sai di palu do i molo dung di ari minggu pagi laho paboahon na adong patupahon parmingguan jala sasintongna songoni ma cara ni huria i manjou dohot paingothon sude angka ruas ni huriana asa ro tu parmingguan. Alai mamereng di namasa hita, nang pe nunga sude umbege suara ni giring giring i, sai tongtong dope godang naso mamparohahon jala terbukti do i, sai tongtong do godang naso ro mandohoti parmingguan, na ni ida ni maata godang do na sibuk ni angka ulaon di jabu na, songoni ma tong na paturehon angka pahan pahanan dohot angka ama na gabe godang mambahen ari minggu parsadarian i marpungu di lapo dohot angka donganna, bahkan mungkin adong do tong na mangula di ari i. Hombar tu cerita on, sintongna ianggo marsiajar hita tu hata ni Debata sasintongna suara ni giring giring i tudosma i tu suara ni Debata na ro manjou hita na pabotohon asa ro hita marminggu, siala ro do Debata di bagas joro patuahon pesta haluaon na mamboan dame marhite hasesaan ni Dosanta nang Hata ni Debata ima hata hangoluanta i, alai jotjotan tardapot sarupa do pangalaho ni hita jolma songon tu umpama di jamita sadari on.

 

Molo taparate atehon do umpama di jamita sadari on, di umpamahon Jesus do taringot tu harajaon banua ginjang i songon sada raja na patupahon pesta pangolihon anakna. Jala marhite umpama on dipabotohon tu hita tung godang do na sinuruna laho mangontdang nang paboahon di sude asi ni roha naung pinaradena tu sude otndangan na i, alai molo tabereng do di ayat 5 “alai laho be do nasida di tois ni rohanasida, na sada tu haumana nasada tu partigatigaonna” bahkan na gabe unjahat sian i, na gabe dohot do naposo na padalanhon otndangan na i gabe di pusa songon na didok na di ayat “6”. Songoni do nang dihita, nunga marganti soring angka siboan barita na uli tu hita, bahkan molo di jaman nuaeng nunga lobian siboan barita na uli be dihita alai sai torop dope naso manjangkon denggan.

Alani i, aha do sasintongna na naeng dohonon ni Jesus tu hita marhite umpama di turpuk jamita on ?.

Ia molo taparsiajari secara teologi umpama na di turpuk jamita on, ala manaringotu taringot tu harajaon ni Debata do umpama on, sasintongna ia sahalak RAJA na di umpama on mandok Debata ma i, jala sahalak PANGOLI manang mempelai i ima sasintongna Jesus Kristus, jala TAMU undangan na i ima sasintongna Huria nabadia i manang na hita on, ima angka jolma na ni asian ni Debata, naung pinorbadiaanNa.

 

Alani do, molo tarimang rimangi jamita on, sasintongna umpama ni Jesus on manaringoti taringot tu asi ni roha naung pinatupaNa do tu hita, ima taringot tu harajaon ni Debata na saleleng ni leleng na i, naung rade di bahen Debata dihita saluhutna marhite Jesus Kristus, jala sude do hita di otndang tusi asa parsidohot jala malua hita, sonang dibagasan dame na manongtong.

Molo songon di pangajarion ta pe, ia molo ro hita di ari sadari on nang di ganup ari minggu tu bagas joro ni Debata sasintongna na mangadopi undangan manang na jou jou ni Debata do hita, asa dibagasan dame hita marhite na tajalo hasesaan ni Dosa nang hataNa nabadia i, jala di asi ni roha ni Debata naung ta jalo i, sintongna ingkhon pujionta ma goarNa nabadia i dibagasan las ni roha dohot biar ni roha di sude angka silua ni tanganta na tapasahat tu harajaonNai. Alani songon di bagian na parjolo naung di dok tu hita saluhutna nakkin, unang ma ta tulak panjouan ni Debata di hita, ai di otndang do hita tu hasonangan na manongtong, alani i ingkon alusionta do i dibagasan unduk n iroha jala mian ma hita di bagasan Ibana.

 

 

2.      AI DIPARADE DEBATA DO DIHITA SALUHUTNA

Molo tabereng do di ayat 4 dohot ayat 8 didok Jesus do marhite umpama i, “nunga rade saluhutna, ipe ro ma hamu”. Sasintongna naeng dohonon ni Jesus do nang tu hita saluhutna marhite umpama on “ro ma hamu saluhutna jala ndang pola boanon muna agia aha, ai nunga huparade saluhutna”.

Ia molo hita di portibi on ro mangadopi otndangan ni angka famili manang na ale ale tontu ikkon boanonta do songon naung ni aturhon di paradaton minimal amplop. Ima bedana mangadopi otndangan ni hita jolma maradophon otndangan ni Debata. Ia molo hita ro mangadopi otndangan ni Debata lumobi ma taringot tu na manjalo haluaon na saleleng ni lelengna ndang ringkot hita mamboan manang aha dungkon ni saluhut dosa na taulahon asa di sesa Debata, jala solukhononNa ma tu hita haluaon na manongtong i.

Porsea ma hita, nunga diparade Debata be dihita haluaon na manongtong marhite Jesus Kristus, diparade do nang Jubah hasintongan/kebenaran marhite naung bingukusna hita di habadiaon dibagasan pandidion na badia i, jala sai tongtong do di bahen tu hita boa boa nang otndangna marhite barita nauli, ima barita hamubaon ni roha “pertobatan” asa mulak hita tu Ibana, jala dohot haporseaon na togu pe di parade dihita saluhutna, ai ndang tartungkangan hita dalan lao tu surgo i ianggo so sian dalan na pinarade ni Jesus i.

 

Marhite turpuk jamita on, di ayat 11 muse didok “alai laho bongot raja I mamereng angka tamuena, dapot matana ma disi sada halak naso marpangkean pesta” jala di udutna di ayat 13 di pabali ma naso marpahean na denggan i tu inganan na holom marimpotimpot. Aha do na naeng dohonon ni ayat on dihita sadari on ?

Sasintongna on ma na naeng dohonon ni Jesus dihita saluhutna ndang layak di harajaon ni Debata angka NASO olo mananggalhon gogo hadirionna laho bongot tu harajaon ni Debata, jala nang pe nungga ta oloi jou jou ni Debata gabe sisoada do i ujungna ala so tunduk hita tu huaso na i, astuanna “tung torop dope halak karisten di ari parupudi on na mangasahon hadirion dohot pambahenanna sambing di hangoluonna, dohonon rajin do nian marminggu jala parhuria do alai dibagasan rohana sai di pingkir do pambahenan, gogo dohot status social umbahen gabe sintong di adopan ni Debata jala partohap di haluaon i” molo istilah saonari dohonon ma on “kesombongan rohani-Iman naso marparbue”.

 

Alani i, hita saluhutna molo nunga ro boa boa tu hita marhite barita nauli jala di otndang Jesus hita laho manjalo harajaon na i, sude ma hita olo mangauhon panjouon na , jala ingkon tinggalhononnta do sude angka na buruk i “dosa” jala ta jalo ma pahean na sian Debata ima haporseaon na togu i na manongtong pataridahon angka parbue na denggan.

 

 

3.      Asa tu hangoluan na saleleng ni lelengna hita

Amang inang, sian na di tompa Debata jolma i sahat tu nuaeng nunga sangkap ni Debata hian mambahen jolma i, ingkon sonang di harajaon na i. Alai ala ni dosa i naung mangarajai roha dohot pingkiran ni jolma i gabe torop ma jolma na mardalan di hagolapan jala mandao sian Debata, alani dihita saluhutna, marhite turpuk jamita sadari on marulak ulak do jou jou Debata asa olo hita masuk tu harajaonna i, alani ta jangkon ma i dibagasan las ni roha mardongan biar ni roha maradophon Debata, lapatanna unang be sai tapangasahon hadirionta alai unduk ma rohanta jala tapakke ma jubah hasintongan naung ni lehon na i dihita ima habadiaon ni Jesus Kristus naung disolukhon dihita saluhutna, jala manongtong ma hita dirajai haporseaon i, asa sude hita na jinouna tarpillit sijalo tumpal hangoluan i di ari na parpudi. Amen