MARKUS 6 : 14 – 29 // Jamita minggu VII dung trinitatis - GKLI

Markus 6 : 14 - 29

Thema   :  BARANI MA HITA MANGHATINDANGKON NA NASINTONG

Patujolo : Jamita minggu VII dung Trinitatis di ari sadari on tarbuatma sian Evangelium Markus, ia molo Evangelim Markus on ima sada buku na badia na fokus manorangkhon taringot tu hadirion ni Jesus Kristus na ro tu portibion gabe MESIAS. Molo ta ihuthon do Jamita di turpuk on, dung torop di pamasa Jesus angka halongangan, mulai na mangajari sian huta hatubuanna, laos paborhathon angka sisean-Na marbarita nauli. Laos ido umbahen na gabe sar barita taringot tu hadirion ni Jesus di tingki i, istilah saonari boi dohonon mansai Viral do Jesus di tingki i alani angka hagogoon na. Umbahen naung sar barita i, sahat ma tarbarita tu penguasa ni luat Galilea di tingki i, alai torop do naso manghaporseai barita i, Jala dang barani nasida mangahatindangkon na sintong taringot tu Jesus Kristus. Sai di rippu nasida do si Johannes pandidi Jesus Kristus i, Jala adong do mandok si Elia. Molo tapatudos do tu na masa nuaeng, torop do di hasogohon angka donganna ala barani pasahathon hasintongan songon na niulahon ni si Johannes pandidi na pasingothon Raja i. Jala di tingki on pe torop angka natua tua di hasogohon ala mandalanhon angka ruhut ruhut hasintongan dengan tegas jala torop do nang angka na marsogo tu angka na burju ala so olo berkomporomi dohot angka naso sintong, bahkan olo di dok patoho tahohon. Alani nuaeng marhite turpuk Jamita sadarion di podahon Debata do tu hita asa :

THEMA : “BARANI MA HITA MANGHATINDANGKON NA NASINTONG”

1.  NANG PE DI HASOGOHON ANGKA DONGAN HITA (Low)

Sada hal na naeng sidohon “Ia molo so adong na barani manghatindangkon barita taringot tu hasintongan ndang mungkin idaonta be angka na dumenggan manang na angka na denggan tujoloan on, lumobi ma taringot tu perubahan”.

Jadi molo tapaihut ihut do turpuk jamita di ari sadari on, ima taringot tu hamamate ni si Johanes Pandidi, dison boi do jelas antusan bahwa mangula do sibolis i di roha ni Raja Herodes, lumobi ma tahe di si Herodias. Di hasogohon ibana do si Johannes pandidi ala na tuppol mandok "ndang tama buatonna si Herodias anggi boru nai gabe dongan saripena". On do boncir paraccitan ni roha dohot dendam ni si Herodias maradophon si Johannes pandidi i. Alai anggo Raja Herodes mabiar do sasintongna tu si Johanes pandidi, ala di tanda raja Herodes sada halak na tigor roha do si Johanes pandidi (Mark. 6 : 20). Alai holan alani dendam nang accit ni roha ni si Herodias sai di lului do dalan lao mambunu si Johanes. Jadi, jumpa ma di tingki i raja Herodes patupahon Pesta perayaan Ulang tahunna, pola do di undang ibana torop angka Raja sian luat Galilea, nang ro di angka nasangap di tingki i. Di tingki i manontor ma boru ni si Herodias jala mansai tertarik do simalolong ni raja i marnida tortor ni boru ni si Herodias i, jadi alani giot ni roha ni raja i marnida tortor ni boru ni si Herodias mar uari (Bersumpah) ma Raja i asa dipaido nasa sipangidoanna. Umbege i laos di jumpai namanortor ima natoras jala di paido si Herodias ma asa Ulu ni si Johannes pandidi di pasahat. Di sada sisi sebagai sahalak Raja ibana tung mansai ringkot hian do manjaga harga diri maradophon angka tamuena, lumobi tahe ma asa unang tardapot ibana gabe sahalak raja na melanggar janji di adopan ni angka natorop. Jadi laos di oloi ibana ma i jala di lehon ma ulu ni si Johanes pandidi di atas ni talam. Marhite on ingkhon do antusan bahwa “Ndang tama jala ndang boi hita jolma Mar Uari “Bersumpah” (Imamat 19:12) lumobi maradophon donganta jolma” alai naeng ma nian songon hata ni Debata na barani mandok olo dohot daong (Jakobus 5 : 12). Ai sian ido tandaon ni jolma hadirionta, lumobi ma hita saluhutna naung mananda Jesus Kristus, Sian angka uluan manang na angka ruas pe ringkot do ingkon berhati hati mandok sidohononna, jala ingkon barani do mandok hasintongan tanpa plinplan, ndang boi mambaen keputusan tanpa arah lumobi ma mambaen keputusan lao mangahut tu diri (Roma 12:2). Molo tabereng sian sisi kekuasaan, sasintongna anggo sian hadirion ni si Herodes sebagai sahalak Raja ibana, berhak do Ibana menggagalhon hajahaton i, jala berhak do ibana manimbangi taringot tu angka permintaan na merugikan dohot manguntunghon, boi do ibana mamillit dia na cocok jala dia na maralo tu roha lumobi ma tu haporseaon, alai ala naung holong rohana di si Herodias jala asa unang maila ibana maradophon angka natorop i di oloi ibana ma i.

Na marlapatan mago ma hadirionna sebagai raja alani sumpah nai, dang margogo be hati kecilna “panandaionna di si Johannes”  alani holong na marparbuat i. Alani do angka dongan dang di halomohon Debata hita marsumpah, lumobi di uhum ni Debata di patik na pasiahon di dok do “Unang ho olo manghatindanghon hata na so tutu maralohon dongan jolma” na marlapatan mai “Ingkon dihabiari rohanta Debata jala ingkon holong rohanta di Ibana, asa unang hita olo manggapgapi dongan jolma manang manjehehon manang pahatahatahon, paoruhon sangapnasida, ingkon niampinan do dongan jolma anggo so tangkas dope diboto salana. Holan uhum na denggan i do paboaboaon.

Alani do molo mamereng do hita di na masa nuaeng on godang do tong hita nasai olo bersumpah holan laho mangomo di angka ugasan, jala torop dope NASO barani mandok angka nasintong, plinplan, mardua roha laho mambahen keputusan na dumenggan, bahkan na sering terjadi torop nuaeng na menghalalkan segala cara demi kesenangan pribadi, demi keuntungan pribadi, jala demi menjaga perasaan, sehingga tinggal ma hasintongan i.

Marhite hite turpuk on di podahon do tu hita ganup, naso tama hita marhansit ni roha manang na gabe dendam tu angka dongan, molo adong angka dongan na paingothon hita molo sala manang na hurang hita di angka pangalaho manang na pangkataion ingkon do tandaon diri, asa unang laos gabe i di pangke sibolis i dalanna lao mambaen hita ndang boi padamehon rohanta. Alani do asa di paingot Debata hita molo pe masa rimas ni roha unang sampe mago mata ni ari(Efesus 4 : 26-27). Unang tabalas na denggan na binahen ni dongan dohot angka naso tingkos, asa unang songon na didok ni peribahasa “Air susu di balas dengan air Tuba”. Lumobi ma tahe di hita halak batak nuaeng on, bangkona do torop na maol paingoton nang pe nga sala sae naeng do guru dok di ibana, mungkin ala na sahalak uluan di sada organisasi menganggap bahwa selalu benar, bahkan na merasa senior di angka parbinotoan manang na parkarejoan pantang di paingot di angka hahurangan, laos songoni nang gabe pemimpin di tonga tonga ni Keluarga pantang di paingot Istri manang Ianakhon ala merasa Kepala (Pengatur) dalam keluarga. “Sasintongna porlu do hita sadar “dung madabu jolma i tu bagasan Dosa, ndang adong be hita na tingkos, na marlapatan ndang adong be na sempurna selain ni Jesus Kristus i” alani di ngolunta on, ingkon do saling marsipasingotan di bagasan holong, marsiajaran di bagasan holong jala maju bersama untuk lebih baik.

Marhite jamita di minggu sadari on tardapot do Raja Herodes madabu tu bagasan dosa ima marhite uhum na pa 10 hon i. Di podahon do tu hita asa unang olo mamolamola pardihuta ni angka donganta, mambuat angka ugasan na di donganta, manang dihana pe i ndang tama buaton ta na di angka dongan, ai di sarihon jala di parmudu mudu Debata do hita di nasa ngolunta siganup ari. Artina tu ganup hita pe ndang boi hita marroha roha laho mambuat angka ugasan ni dongan, baik istri ataupun suami orang nang agka ugasan na laon, alai ingkon do jagaon diri, jala ingkon tongtong di bagasan holong ni roha maradophon Debata nang maradophon dongan asa unang madabu hita tu Dosa i.

Taringot tu manghatindangkon na sintong, sasintongna marhite turpuk on boi do jelas botoonta di hatindangkon jala di jaga si Johannes pandidi i do hadirionna sebagai Sahalak suruan ni Debata ima na mamaritahon taringot tu barita hamubaon ni roha, patupahon ulaon pandidion nang songoni barani mandok nasintong maradophon angka jolma naso tingkos, lumobi ma di tingki i na paingothon Raja Herodes naso tama buatonna anggi borunai gabe dongan sajabuna. Hape molo tapatudos do tu namasa nuaeng di hita on, molo tabilang bilangi torop nuaeng sian kalangan ni angka Pemimpin pemerintahan, Pemimpin Agama, angka pengajar, laos songoni tu angka Uluan ni Huria na mangula di bagas joro i godang nunga ndang barani mandok nasintong ala naung masuk tubagasan persekongkolan taringot tu dosa. Alani ido di masa nuaeng on gabe moru do sangap ni angka Pamarenta, angka uluan ni Organisani nang Huria laos tu uluan ni keluarga pe moru do sangap ni angka Ama ianggo so tingkos manghatindangkon hasintongan, ianggo so gabe ama na denggan di tonga tonga ni keluarga olo ma gabe di anggap rendah di tonga tonga ni keluarga. Alani do marhite singot-singot on naeng nian tapatudos dirinta songon si Johannes barani mandok nasintong nang pe ingkon di agohon hosana. Songon si apostel Paulus di paingot ibana do marhite surat na tinongos na “2 timoteus 4 : 2” didok do asa ingkon pasingoton nasa naso sintong hombar tu lomo ni roha ni Debata. Ido na naeng si ulahononta di ngolutta on, ingkon do barani mandok na sintong. Ai sian ido tandaon toho do hita marsiajar paubahon roha mangulahon lomo ni roha ni Debata. Ia molo tung pe hape gabe accit roha ni angka dongan, angka uluan nang angka ale ale ala na barani hita mandok hasintongan i, sada las ni roha do i di hita jala gabe tau sangap di goar ni Debata do i molo barani hita mandok angka na sintong, alani unang mabiar hita.

2.  ASA DAPOTAN TUA HITA JALA MARSANGAP GOAR NI DEBATA.

Hatuaon, jala hasangapon goar ni Debata boi taida, tatanda jala tahangoluhon, molo olo do hita mangolu di bagasan Hasintongan. Ganup jolma naung marhaposan tu Debata, na tongotng manghamuliatehon hamamate ni Kristus i angka ido na olo barani manghatindaghon angka na sintong. “Berani menyatakan yang benar tanpa memikirkan Resiko di benci orang” Molo taingot do sejarah Dr Martin Luther na mandok “Here I Stand” na marlapatan nasa pangajarion naso sintong hombar tu hata ni Debata barani do ibana mandok dison do au jongjong, ima holan laho memparjuanghon hasintongan taringot tu hata ni Debata. Jala boi do tabereng nuaeng gabe sada hatuaon do i di Ibana jala tau sangap di Goar ni Debata, gabe torop nuaeng angka Ugamo na sintong manghangoluhon dohot manghatindanghon habonaran i taringot tu pangajarion ni Dr Martin Luther.

Di bagian na paduahon on ma tandaonta songon dia do hadirionta sasintongna, “tohodo Partigor manang na sipatigoron”. Taringot tu Hatuaon, jala taringot tu hasangapon ni Debata. Sasintongna ndang sian roha hajolmaon ta on na mambaen hasangapon di Goar ni Debata, ianggo Debata i sangap do torus nang pe ndang olo hita mangulahon angka hasintongan “kekudusan Allah tidak berpokus pada Manusia”. Alai asa tanda hita angka na martua, naung matoras di bagasan haporseaon, naung tinobus ni mudar ni Kristus i, ingkon do panggora ni tondi i na mampargogoihon jala na mambahen hita barani mandok na sintong. Ingkon do tajaga hadirionta di bagasan hasintongan, jala barani paingothon, ingkon do olo mangajari jala manogu-nogu di angka na gale, ai ido patandahon naung toho Kristus i maringan di hita, jala ima na didokna hatuan di angka naung tinobus ni Mudar ni Jesus i. Alani di ganup angka na ginonggomanta di portibi on isarana di angka Organisasi, Huria, Keluarga ingkon boi do hita gabe paniroi, tau tiruon. Jala na pastina dang tawar menawar laho mangulahon angka na denggan. Alani di tingki on pe sude ma hita barani manghatindanghon hasintongan i, lumobi ma manghatindanghon Jesus Kristus sipalua hita i, ingkon do olo hita paingothon nasa angka nasala manghaporseai Jesus Kristus (tersesat), ingkon do paboaonta lomo ni roha ni Debata. Asa unang lilu be angka donganta jala asa unang sala be angka motivasi ni hita on na mangihuthon Jesus Kristus. lumobi ma asa di ujung ni ngolunta on dapotan tua ma hita jala ngolunta on tau hasangapon ma di Debata. Amen !

dengarkan disini  : https://youtu.be/5N8A8bGEpyA