JAMITA MINGGU JUDIKA – PASSION V
22/03/2026
Evangelium : Johanes 11 : 46 – 53
Patujolo : Angka dongan sahaporseaon, dung lam sar barita halongangan na pinatupa ni Jesus, marhite na pinahehe ni Jesus si Lazarus sian na mate gabe lam torop angka jolma na porsea, jala mangihuthon Kristus Jesus i. Molo di horong ni angka na masihol di haroro ni sipalua tontu gabe sada barita las ni roha do i, alai di turpuk jamita on, di namasa di halak Jahudi nang di horong ni halak Parise ala so porsea nasida di Jesus Kristus gabe dipungka nasida do parrapotan bolon laho pados tahi nasida manangkup Jesus, ai biar situtu do roha nasida molo lam torop na mangihuthon Kristus Jesus. Di ari parpudi on pe molo taparohahon do denggan, sasintongna lam torop do nang halak naso mangharingkothon angka barita na denggan, barita haluaon, lumobi ma na olo manghatindanghon nang manghaporseai Jesus Kristus. Nga lam torop be angka pangajari na sala, na manghatindahon na sala taringot tu Jesus Kristus. Sialani i, marhite hata ni Debata di minggu Judika sadari on ondol paingothon hita marhite tema ni Jamitanta na mandok :
Thema : PORSEA MA HITA JESUS DO ANAK NI DEBATA
1. ALANI UNANG TALEHON BE ROHANTA DI RAJAI SIBOLIS
Molo tapaihut ihut do pardalanan pelayanan ni Jesus Kristus marhite surat ni si Lukas, tung mansai maol do tarjalo ni halak Parise nang angka sintua ni malim taringot tu hadirion ni Jesus Kristus(Mat.23:1-36;Mat.12:24;Luk.7:30). Ndang tarjalo nasida angka halongangan na pinatupa ni Jesus Kristus i ala so porsea nasida, Jala tung maralo situtu do haporseaon nasida maradophon Tuhan Jesus Kristus. Alani do molo tajaha nakin di turpuk jamita on, martuptup/marrapot do halak parise nang sintua ni malim naeng pados tahi laho manangkup Jesus Kristus, ai biar situtu do roha nasida molo lam tung torop na mangihuthon Kristus Jesus, jala biar do nang nasida molo gabe di rajai halak rom jala di buat angka ugasan “arta” nasida (47,48). Alani disangkapi nasida do dalan laho manangkup Jesus asa unang lam sar angka barita na pinatupa ni Jesus, lumobi ma songon di topik na parjolo “dipangolu Tuhan Jesus si Lazarus” manambai sogo ni roha nasida do i, sotung lam torop na porsea.
Sasintongna, ringkot do jumolo ingkon ta teliti jala ta antusi, aha do umbahen ndang lomo roha ni halak jahudi “parise nang sintua ni malim” i di hasintongan taringot tu hadirion ni Jesus ??.
Molo tajaha do di surat ni si Johanes “Joh.17:25” di na martangiang Jesus tu Ama i didok Jesus do ndang di tanda portibi on Debata. Jala molo ta patudos muse tu Johanes 8:44 didok do disi bahwa “na mar ama tu sibolis do ganup angka na olo mian di bagasan sangkap na jahat, ai angka lomo ni roha ni sibolis ido di sangkapi jala di ulahon”. Alani dapot astuanta bahwa na umbahen ndang porsea halak jahudi di hadirion ni Jesus sasintongna angka ima ulaon ni SIBOLIS na sai tongotng mangarajai di roha nang di pikkiran nasida. Alani do, molo tabereng di turpuk jamita on (49), di na martuptup/marrapot nasida, jongjong do si Kayapas ima sahalak sian horong ni yahudi golongan saduse na gabe uluan di sanhedrin “majelis tertinggi yahudi” na mambaen keputusan, tumagonan do mate sahalak dari pada torop jolma. Pandohan on sasintongna pandohan na jahat do on, ai holan sibolis do na marsangkap na roa, lumobi ma na naeng pasidunghon hosa ni Jesus (Joh.8:44;1Yoh.3:8).
Marhite jamita on, dipaingot hita asa ganup angka na porsea, naung manjalo asi ni roha marhite pandidion na badia nang hataNa unang be olo hita mamelehon dirinta di pangke si bolis gabe ula ulana. Ingkon barani do hita maninggalhon saluhut angka sangkap ni sibolis sian nasa rohanta. Songon sangkap ni Debata naung pinatupaNa di hita, dipaias jala di gotaphon nasa dosa hamatean i sian hita marhite Aek di pandidion i, nang marhite Jesus Kristus naung mate jala hehe sian hamatean i, sasintongna ingkon olo ma hita mangalehon ganup dirinta gabe pelean na mangolu tu Debata marhite, na manjangkon hasintongan dohot manghatindanghonsa tu ganup jolma.
2. AI NGA RO JESUS SIPALUA I TU PORTIBI ON PALUAHON ANGKA NA PORSEA
Ganup hita na porsea di Debata, ta antusi jala ta haporsea do Jesus ro tu portibi on laho papatarhon holong ni roha ni Debata do tu portibi on (Joh.3:16) lumobi ma tu ganup hita jolma na tinoppaNa(Yoh.14:6). Sian mula ni mula ni portibi on (masa panompaon) ditahi Debata do, asa ganup jolma i nian mian di bagasan hasonangon, jala marsonang sonang di bagasan panggomgomion ni Debata, ido asa jumolo sandok na ringkot di jolma i di tompa Debata dung pe asa jolma i tumiru rupa dohot pangalahoNa (imagodei), dung i pe di bahen ma jolma na parjolo i di porlak Eden, ima inganan hasonagan. Alai, ala so tangi jolma i di Debata, di oloi do sangkap ni sibolis i, gabe madabu ma tu bagasan dosa na mambahen holang hita sian Debata(Kej.3:4). Di na holang jolma i sian Debata ndang adong na boi ise pe pajonokhon diri tu Ibana, lumobi ma na padomuhon hita mulak tu Debata ianggo so Ibana sandiri na padomuhon DiriNa tu hita marhite Jesus Kristus(Efe.1:4). Di na punjun jolma i sian Debata ala ni dosa, ndang adong na boi paluahon jolma i sian gonggoman ni dosa hamatean i, ianggo so Debata sandiri na paluahon hita marhite Jesus Kristus(Yoh.14:6). Debata do napaluahon hita, ai ndang adong jolma na boi paluahon dirina sian gomgoman hamatean i. Nunga di palua hita marhite hamamate dohot haheheon ni Jesus Kristus, sae do utang ni dosa hamatean i holan marhite mudar ni Jesus Kristus sambing(1Joh.2:2), jala ganup na porsea angka na mian di bagasan pangkirmon nasintong i, holan ido muse na partohap di asi ni roha ni Debata.
Haroro ni Jesus tu portibi on, naung sinangkapan ni Debata do i, jala na ingkon mate do Jesus Kristus di hau pinorsilang songon naung ni aturhon ni Debata tu Ibana, alai di hata ni Debata di dok do marjea ma angka naung na manjehehon Jesus Kristus (Luk.22:22). Marhite turpuk jamita sadari on, di minggu Judika on paingothon hita gomos asa manongtong ma tapelehon dirinta holan tu Debata sambing. Memang selama di hasiangan on ndang adong hita jolma na boi secara sempurna 100% mamelehon diriNa tu Debata ala mangula dope si bolis di portibi on. Alai songon na nidok ni tokoh Reformasi “pertobatan setiap hari”. Ringkot do ingkon ulahononta i di ngolunta ganup marsada sada, ai ido hataridaan ni ngolu ni jolma na manontong marpangkirimon tu Debata, siganup ari – ganup tingki ro mangido ampun tu Debata di sandok dosa na taulahon. Molo boi do tarulahon hita di ganup tingki pajonokhon diri tu Debata, tontu ndang adong be tingki di sibolis i laho manegai pingkiranta mangalo Debata, lumobi ma manundalhon asi ni rohaNa.
Sialani i, marhite goar ni minggunta sadari on, minggu Judika “Luluhon au ale Debata Jahowa”maz.17:23. Porsea ma hita, lehonon ni Debata do di ujungna muse Hasintongan-Keadilan di ganup angka na manongtong marpangkirimon tu Debata. Ai nunga di pasintong Debata hita marhite diriNa sandiri na pasidunghon dosa hamatean i. Alani mian ma hita di bagasan hasintongan naung ni lehon ni Debata di hita, porsea hita sintong do Jesus i anak ni Debata na gabe jolma jala Debata situtu. Jala anggiat ma nian di masa mingu minggu pra paskah on, ta pangke ma tingki gabe masa perenungan di hita marningot haluaon ta naung pinatupa ni Jesus, marhite sitaonon na parir mate Ibana di hau pinorsilang jala hehe sian hamatean i holan humongkop hita jolma, manongtong ma hita marhaporseaon tu Jesus Kristus, Amen !.
Pdt. Resort Baloi kolam Batam
Pdt. Ardianus Situmorang S.Th
