Jamita Matius 2 : 1 - 11

EVANGELIUM: MATIUS 2 : 1-11

Patujolo:

Ala taon baru dope nuaeng, dohonon do tu hamu saluhutna amanami, inanami dohot angka naposo bulung, “Selamat tahun baru ma dihita saluhut na!” Jamita nantuari di hurianta mandok asa sude hita manghaposi Tuhanta di ngolunta be, asa tiur haporseaonta nang langkanta mandalani sidalananta. Domu tusi, di taon baru on, sai ditogutogu Tuhanta i do hita asa unang ganggu hita manghaporseai Ibana. Sotung dohot hita manulak dohot manundati ulaonNa diportibion.

Nang pe taboto godang cara-cara ni portibion manulak Tuhanta i dohot martahi manundati angka nasinangkapanNa di portibion unang tata haporseaonta. Sahat tu tingkion sai jumpang do pangalaho sisongoni diportibion. Alai anggo hita angka naporsea ro ma hita tu haimbaruon ni ngolunta nang partondionta. Nunga ro Ibana mandapothon hita asa tadapothon jala tasomba ma Ibana. Laos i do sidohonon ni jamitaon tu hita;

Thema : Tasomba ma Tuhan Jesus

1. Unang tatulak Ibana.

Cara ni Debata do na mamangke jala marsuru angka parhapistaran i di na mangalului ingnanan ni hatutubu ni Raja Sipalua i. Dipangke nasida paboahon tu angka jolma na di Jerusalem.

Tutu ahli perbintangan do nasida jala ditingki i nunga ra adong piga-piga halak na boi mangamatamati bintang jala dipangke gabe alat ramalan di hajolmaon, jadi hombar tu ari dohot bulan partubu ni jolma nunga ditetaphon bintangna isarana; bintang aquarius, pisces, scorpiodohot na asing, laos disi do diramal manang songondia ngolunta sadari i manang saminggu i. Alai anggo parhapistaran i, khusus do nasida ditogutogu Debata tu ulaon na marhadohoan. Asa marhitehite nasida dipabotohon di liat portibion naung tubu Raja na pinarbagabaga i. Mansai las do roha nasida paihutihut bintang i, ndang olo ganggu nasida paihutihuthonsa, ai porsea do nasida dipanogunoguon ni Debata. Sar do baritai di Jerusalem songoni nang tu sipareon ni si Herodes

raja di Judea. Alai dang adong sikap na parduli mangalului Tuhanta i, sip sambing do nasida, sibuk dengan urusan masing-masing tarlumobi tingki i marroan be do tamu ni angka parhuta i jala

alani i do umbahen gabe di bara ni pinahan inganan ni hatubuan ni Tuhan Jesus ai dang adong be jabu bahen parbornginan nasida, sude masidalian. Jotjot do jumpang pangalaho sisongon on di

tongatonganta halak Kristen nang di ari parpudion. Hinorhon

nikesibukanta di angka ulaonta siganup ari dang parduli be hita

mangalului ngolu ni partondionta. Godang tabahen sidalianta,

sipata tadok do adong tamunami, hurang sehat ahu, naeng borhat

hami dohot sidalian na asing. Taida ma di parmingguanta siganup

minggu, torop na so marminggu sian ruas i, sai dilului Tuhan i do

hamu, alai ditutup hamu do pintu ni rohamuna.

Songoni do nang si Herodes, pintor tarsonggot do Ibana dung dibege

naung tubu Raja i. Tarsonggot ibana ala sai dirimpu do sainganna

Raja i, sotung do Ibana manggantihon ahu, ninna rohani si Herodes

i do, ai dang rade ibana diganti. Alani i diatur ma strategi/cara na

laho mamunu Poso-poso i (Matius 2;13). Dipapungu ma angka

malim dohot sibotosurat ni bangso i manukkun inganan ni

hatutubu ni Sipalua i. Dohot do nang parhapistaran i disihirsihiri

asa dipabotohon tu ibana. Dirimpu si Herodes do gumogo Ibana

sian Debata, dirimpu do hummalo ibana sian Debata. Samalomalo

ni jolma jala sagogogogo ni jolma dang tarambatansa ulaon ni

Debata. Manang sude jolmamangambati sangkap ni Debata ndang

na tarambatan jolma. Urusan ni Debata dang tarsampuri hita,

urusanta do boi sampuran ni Debata.

Porlu ta patutoru rohanta tu adopan ni Tuhanta, sotung adong sian

hita na paginjanghon rohana di adopan ni Debata, gabe mangambati

ulaonNa di huria i. Ai adong do bangko di hita halak batak molo

songon antar adong di ibana pintor naeng mangarajai di huria i,

marlomolomo di huria i. Nian molo denggan do pamboananna di

huria i jala lam tu maju na dibahen dang pola gabe si persoalhonon.

Anggo diadopan ni Tuhan i dos do hita sude, sada do hita.

Muba ma rohanta, tapasiding jala tabolongkon ma sian hita bangko

bangko i, unang tatundali jala tatulak Tuhanta i, ta paserep ma

rohanta marsomba tu Ibana.

II. Ibana do Raja na pinarbagabaga i.

Hira sude do panurirang di Padan na Robi manurirangkon haroro

ni Raja Sipalua i, taringot tu hatutubuNa, ulaonNa, huaosoNa,

sitaononNa, hamamateNa dohot haheheonNa, jala digonopi sude

dibagasan ngolu ni Tuhan Jesus. Ndang adong na mencurigakan di

panurirangon i. Nang pe jolo maribu taon asa digonopi alai sintong

jala tutu situtu do nanidok panurirangon i. Tuhan Jesus do anggo

pusat ni pamaritaon nasida. On do na paposhon rohanta na porsea

di Tuhan Jesus, ai dang na dibahen-bahen jolma gabe songon cerita

manang turiturian barita haroro ni Tuhan Jesus. Alai tutu situtu

do sangkap ni Debata.

Tabereng diturpuk on didok angka malim dohot sibotosurat ni bangso

i do mangalusi si Herodes “ Huta Betlehem na diluat Judea do, ai

songonon do pandok ni panurirang i “ ia ho huta Betlehem, apala

tung na ummetmet ho ditonga-tonga ni angka huta na di Judea,

ai ho do huta haroroan ni Raja i, na marmahan Israel bangsongki!

(ay.5-6). Pandohan on nunga di surirangkon panurirang Mika hira

hira ditaon 400-500 andorang so Kristus di tonga-tonga bangso

Juda.Jala tutu digonopi do i, di na tubu Tuhan Jesus di Betlehem.

Digoari do Ibana Raja na marmahani Israel. Molo ulaon ni Raja ima

partogi, pemimpin, mangatur, membela, pasonangkon na ni rajaan,

mangalo musu. Tarsongoni do ulaon ni Raja Sipalua i, Ibana do na

mangatur, manguluhon, mangajari, dohot patalu musu.

Alani dosanta gabe gaor pingkiranta, marmusu hita sama hita jala

marmusu hita tu Debata, jala ani dosa i hona uhum hita ima uhum

hamatean sisaleleng ni leleng Na (Roma 6:23). Dang adong nanggo

sada sian hita jolma na tuk paluahon dirina sian uhum on, apalagi

paluahon donganna, ai sude nunga mardosa (Roma 3:23). Alani i

do umbahen na disuru Debata Anak Na sandiri Tuhan Jesus tu

portibion gabe Raja na laho paluahon hita (Johanes 3:16). Tu Ibana

do dipasahat Debata huaso na di tano on nang disurgo (Matius 28;18).

Asa sude na ringkot dihajolmaon tarpatupa Ibana marhitehite

hagogoonNa. Ragam na marsahit di pamalum, na holiton gabe

ias, na mate dipangolu, Ibana do mangalehon mangan 5000 halak

marhitehite 2 dengkke dohot 5 roti. Halongangan do tutu sude

pambahenanna di hita.

Alani holongNa di hita, dilehon do ngoluna pola mate Ibana

manghophop hita sian dosa, mate Ibana diparsilangkon asa

manang ise na porsea di Ibana dapotan haluaon (Joh.11:25). On ma

hasurungan ni Raja Sipalua sian angka raja-raja diportibion. Raja

Sipalua I, tutu-situtu do manghaholngi jolma, pola dohot hosaNa

dilehon laho manobus hita.

Unang ganggu be hita di Raja i, holong do rohana di hamu, naeng

paluaoNa do hamu saluhutna. Jala rade do Ibana manesa nasa

dosanta.

III. Alani tasomba ma Ibana.

Tasomba ma Ibana artina na marsomba pasahathon sude ngulunta

tu Tuhan i, Ibana ma tutu na gabe parsigantunganta. Nunga

menyerah hita di keberadaanta na sailaon na soadong gunana,

gabe sia-sia alai di na ro hita marsomba tu Tuhan Jesus gabe jolma

na arga, jala marguna hita ala di patau hita gabe anakonNa (Galatia

3;26).

Luar biasa cara ni Debata laho patauhon hita manjalo haluaon i

unang ganggu hita disi.

Molo taida do roha ni angka parhapistaran i, tung digoari pe nasida

angka na pistar dipatutoru do rohana marsomba tu Tuhan Jesus

gariada tanda las ni roha nasida na pajumpang dohot Tuhan Jesus

dipasahat nasida do angka pelean na arga ima; sere, haminjon

dohot angka na angur (ay.11)

Nataida dison, keseriusan ni parhapistaran i mandapothon Tuhan

Jesus, tanpa ragu-ragu. Ai nunga diboan hian angka nanaeng

sipasahaton nasida tu Tuhan Jesus.jala sude na i angka barang na

arga. Gombaran ni roha nasida do i patuduhon ingkon na umarga,

jala na dumenggan do sipasahataon pelean tu Debata.

Aha do pasupasu na jinalo ni parhapistaran on ? Debata manogunogu

nasida pajumpang dohot Raja Sipalua I. godang do jolma mulai

sian na tubu sahat tu namate dang boi pajumpang dohot Tuhanta

I. Apala i do pasupasu na umbalga di hita. sialani i, unang tatutup

pintu ni rohanta tu Debatanta, ditaon imbaru on, tapatutoru be

ma rohanta marsomba hita tu Tuhan Jesus asa malua hita ganup.

Amen.

Selamat taon baru ma di hamu saluhutna.

Na sinurathon ni:

Pdt. Jon Albert Saragih, M.Th