Jamita Minggu Kantate // Evangelium : Yohanes 15 : 1 – 8 "Mian ma hita di Bagasan Jesus Kristus"

 

Kantate : Endehon ma Debata/Nyanyikanlah Allah (Maz. 28:1-2)

Evangelium : Yohanes 15 : 1 – 8

 Thema : Mian ma hita di Bagasan Jesus Kristus

1.     Asa unang hona uhum hita

       Dihita saluhutna dongan sahaporseaon di bagasan Jesus Kristus, di minggu naung salpu Minggu Jubilate nunga tatangihon hata ni Debata ima na mandok Jesus do Parmahan na Denggan “di papungu, di parmahani di ajari jala di togu togu do saluhut hita jala di seahon do hosana holan humongkop angka jolma pardosa. Jala di mingguta sadarion di dok Jesus i muse Au do hau aggur na tutu. Molo di angka ulaon hajahudion manang na angka pesta pesta di luat jahudi, sada kebutuhan na paling utama do anggur di setiap angka ulaon nasida. Ido umbahen tabereng di turpuk on di umpamahon Jesus do dirina tu angka jolma i na mandok bahwa Jesus do hau anggur na tutu “Jesus adalah Kebutuhan paling utama”. Di dok Jesus ido Ibana Hau anggur i jala hita ma angka rantingna, jala Debata do nampuna hita na mangaradoti Hau anggur i”Joh 15:1.

       Marhite turpuk jamita mingguta sadari on di podahon do tu hita, asa mian ma hita dibagasan Jesus Kristus. Ia di turpuk on di umpamahon Jesus do dirina hau anggur jala hita saluhutna ma angka ranting ni hau anggur i, angka ranting na sehat na sintong manjalo asupan giji sian hau anggur i ingkon do uli di bulungna, rodi parbue na pe ingkon do godang hombar tu tingkina. Ido asa di dok Jesus i ganup angka ranting naso marparbue, di gotap doi jala di bolongkon. Jala napastina nasa ranting naung gotap sian batang nai ingkon do melos jala gabe masak dungi laos tutungon namai. Artina hombar tusi do ngolunta on, Jesus do batang ni ngolunta, jala ganup hita on ima angka na marpangunsandean tu Debata, angka na mangolu dibagasan hatigoran na manjalo saluhut angka poda hasintongan na denggan sian Jesus ingkon do marparbue di ngoluna siganup ari. Jala ganup angka naso mian di bagasan Kristus Jesus “naso manjalo angka poda hasintongan i ingkon mate do i, bolong laos tutungon. Ganup angka jolma naso mian di bagasan Kristus ndang adong disi parbue ni hangoluan na sintong jala ndang tarbahen i marparbue na denggan.

       Molo tajaha do di ayat 6 tangkas do didok Jesus i ganup angka naso mian di bagasan Jesus Kristus, bolongkonon do i songon ranting i, sasintongna taringot tu haroro ni Jesus Kristus na paduahalihon tu portibi on nunga sai di podahon tu hita iaggo so marparbue hita di bagasan haporseaon na sintong(Yak.2:17), ndang managam di haroro nai, manang na songon 5 parompuan na oto i ndang paradehon miak ni palitona marisuang do panjangkonon nasida, jala laos bolongkonon na ma hita tu api narongko i songon ranting naso marparbue i. Artina marhite Jamita sadari on di paboa Debata do tu hita angka na pinarmahan ni Debata do hita nuaeng songon Batang ni anggur i mangalehon na ringkot di ranting i, jala di hirim Debata do hita marhite naung gabe sakkambona hita dohot Jesus i “Satu daging Yoh.15:5” ingkon do tarida sian parbue ni ngolunta. Ingkon marparbue na denggan hombar tu pangonjar ni Jesus naung maringan di hita. Sialani do sian pangkataionta, pangalahonta, nang pambahenanta ingkon ido na patandahon hita naung toho mian di bagasan Kristus Jesus manang na daong. Sada partinandaan do on bahwa berberda do Karakter, Pola pikir, Sikap dohot pambahenan ni angka hita na mian di bagasan Kristus Jesus dohot angka na satongkin mian satongkin mandao sian Kristus Jesus i. Alani ingkon do hot parbue ni ngolunta, ai angka na manontong ido na sintong na sian Debata.

2.     Asa tarbahen hita marparbue na denggan

       Dongan sahaporseaon, molo tarimang rimangi do pandohan ni Jesus Kristus i na mandok “Ndang tarula hamu agia aha ianggo so marhite Ahu Yoh 15:5” suatu keputusan jala kepastian hidup do on di hita saluhutna bahwa saluhut angka na uli na denggan hombar tu lomo ni roha ni Debata ndang tarulahon hita molo so marhite Jesus Kristus. Isarana “Holong” ndang tarbahen hita manghaholongi donganta hombar tu roha ni Debata inggo so Debata na mian di hita jala ianggo so Debata namangonjar rohanta asa tahaholongi dongan ta lumobi ma angka musunta. Sarupa doi songon ranting nangkin ndang mungkin marparbue ranting i ianggo so adong batang na. Alani do nuaeng tangkas majo tatanda dirinta tohodo hita naung gabe songon ranting ni hau anggur i na marsihohot tu hau anggur i?  Toho do hita naung marsihohot manang na marpangunsandean tu Kristus Jesus naung mian di rohanta ganup? Parbue ni ngolunta siganup ari ima na patandahon naung toho mian Kristus i manang na daong. Hata ni Debata mandok pargabus do jolma na mandok na porsea alai sai dihosomi angka donganna(1Joh. 4:20).

      Alani tu hita saluhutna ra ndang adong apala sada hita na mangkirim asa ambolong, manang na gabe ndang tarpakke, manang na gabe di hasogohon halak alani angka Parbuenta naso ture. Alai sude do hita mangkirim asa sude nian marsonang sonang angka dongan na rap dohot hita, boi di rasahon angka parbue na denggan ima angka holong na tapatupa. Manang na parbue ni haporseaon(Gal.5:22-23). Ingkon do boi gabe siboan hadameon di tonga tonga ni keluarga nang angka luatta be songoni nang di angka parkarejoanta. Ingkon do gabe pannondang di ngolunta siganup ari di saluhut angka dongan. Alani holan sada do dalan “Ndang tarbahen hita na denggan ia so marhite Jesus Kristus” ndang tarbahen hita marparbue songon na di dok na parbue ni haporseaon i ianggo so marsigantung hita tu Jesus Kristus, ianggo so mian Jesus i di hita. Alani i nuaeng hita ganup angak na porsea, naung manjalo pandidion na badia i, naung manjalo mudar dohot daging ni Kristus Jesus i, tapatarida ma Kualitas ni haporseaonta marhite na unduk rohanta di adopan ni Debata asa ibana na manogu nogu hita marparbue na sintong. Asa marsangap Debata marhite ngolunta(1Yoh.15:8), songon na nidok ni apostel i lam balga ma Kristus i alai au lam Gelleng(Yoh.3:30) sudenai holan na ni onjar ni Jesus Kristus. Alani asa tarbahen hita marparbue na denggan ingkon do marsihohot hita holan tu Jesus Kristus sambing songon ranting i na marsigantung tu batangna. Jala ingkon berprinsip do hita saleleng mangolu hita di portibi on ingkon do hita marsihohot tu Jesus Krsitus, ingkon do hita mian di bagasan Jesus Kristus ai ido na hinirim ni Debata sian Hita, jala ima na toho managam hita manjangkon haroro nai, dipasu pasu Tuhan Debata ma hita saluhutna Amen.