JAMITA MINGGU EXAUDI - TANGIHON
Evangelium : Yohanes 17 : 11b – 19
Pengantar :
Dongan sahaporseaon, nuaeng masuk ma hita tu minggu Exaudi, na marlapatan Tangihon. Adong do hata di hita halak batak na mandok “Dos ni roha do sibaen na saut” alani di tingki on naeng antusanta ma songon dia do hasadaon ni roha i?. Andorang so manaek Jesus Kristus tu banua ginjang, di ondihon Jesus i do sisean nai tu Debata asa sada nasida nang pe dang rap dohot Jesus i, nang songoni do tu hita ganup angka na Porsea, di hirim Debata do asa ngolunta on gabe tau las ni roha di Debata marhite hasadaon ni rohanta. Alani hata ni Debata di minggu Exaudi sadari on paingothon tu hita asa :
Thema : SADA MA ROHANTA SONGON YESUS KRISTUS I
1. SONGON DIA DO HASADAON NI ROHA I?
Di hita saluhutna dongan sahaporseaon, dung hehe Jesus Kristus sian hamatean di patandahon Ibana do dirina tu ganup angka sisean_Nai, jala di antusi Jesus do na naeng masa tu angka sisean i molo dung marsirang Jesus dohot angka sisean i. Ido asa molo tabereng do di turpuk on di ondihon Jesus Kristus i do angka sisean nai tu Debata. Jala di hirim do asa sada nian nasida songon Jesus sada do dohot Debata(Yoh.17:11b). Alani do molo tabereng do di ngolunta nuaeng, mansai jotjot do olo timbul rasa kesal, kecewa, bahkan olo gabe mandele hita alani bakkol ni mangalului hasadaon ni roha. Taringot tu na mangalului hasadaon ni roha laos di tonga tonga ni huria pe nuaeng on, nunga maol laho patupahon hasadaon ni roa. Di tonga tonga ni na mardongan tubu pe maol do mambahen hasadaon ni roha songoni ma nang tahe di angka namarhamaranggi olo do tubu akka parhancitan ni roha alani maol na mambahen hasadaon ni roha. Olo do timbul parbada badaan alani maol mambahen sada roha istilahna di na marbagi angka tano “harta warisan”. Alani ikkkon do antusanta hasintongan, ia hasadaon ni roha na tingkos marimpola tu na denggan sesuai tolak ukur na sian Debata holan na ni onjar ni Tondi Porbadia do, jala tondi i sandiri do na tuk pasadahon roha ni ganup hita angka jolma. Jala porlu do botoonta, ia portibion pe boi do mangalehon hasadaon ni roha jala sipata molo tabereng do di angka godang ni na masa nuaeng untaridaan nama hasadaon ni roha na pinatupa ni portibion dari pada na sian Debata, jumotjotan nama umbalga hasadaon ni roha manang na holong ni roha di angka kelompok parjahat daripada di huria manang na di angka hubungan keluarga. Ido asa tabereng na terjadi nuaeng sering do berkorban mati matian angka parjahat holan humongkop donganna, untaridaan nama hasadaon ni roha ni akka parjahat laho pasauthon sangkap ni roha manang na tujuan nasida. Alai di hita saluhutna angka naung hinongkop ni Jesus Kristus, ingkon do antusanta balga pe holong na ni lehon ni portibi on, manang na pinatupa ni angka parjahat i ndang tuk i laho mangimbangi hasadaon ni roha ni angka na marholong ni roha di Debata. Molo toho do hita mian di bagasan Jesus Kristus i ndang apala maol mambahen hasadaon ni roha, jala hasadaon ni roha ido hataridaan ni ngolu ni angka na porsea di Jesus Kristus. Hasadaon ni roha boi tarpatupa molo tutu hita mian di bagasan holong na sian Debata. Ai Jesus Kristus i sandiri nga didok “asa sada nian nasida songon hita” artinya suatu kepastian molo toho do hita mian dibagasan Jesus Kristus ndang maol mambahen hasadaon ni roha, ai hasadaon ni roha i, ima parbue ni tondi “Yoh.15:4”.
Di hita dongan sahaporseaon, marhite hite tangiang pangondianan na pinasahat ni Jesus Kristus i, sasintongna on ma napaboahon sarupa do nuaeng hita dohot angka sisean i, nunga di suanhon Debata tu hita tondi porbadia i, ima na pahothon parpadananta dohot Debata, jala di ayat 14 didok nunga di lehon Barita na uli i tu hita, jala ido na manogu nogu hita mambahen hita porsea di Debata na mambahen hita berbeda sian angka naso manjakkon Jesus Kristus i, alani do molo pe tung maol hita nuaeng patupahon hasadaon ni roha, on ma tanda naso sude dope hita mian dibagasan Jesus Kristus. Molo ndang sude dope mian di bagasan Jesus Kristus i, on ma namambahen maol tarida hasadaon ni roha ni angka na porsea i. Alani do nuaeng di sungguli Debata tu hita saluhutna, ganup angka naung manjalo asi ni roha sian Debata(19) ingkon do mian di bagasan sada ni roha, sada ni roha i ido hataridaan ni holong na sian Debata jala ido patik ni Debata asa tahaholongi ganup angka donganta songon dirinta sandiri.
Alani dongan sahaporseon, hasadaon ni roha i, ima pangkirimon ni Jesus Kristus i di hita ganup angka naung hinongkopna, ganup angka naung hinongkop ni Debata marhite asi ni roha, ingkon do mangolu di bagasan holong na sian Debata, jala hataridaan ni holong i, ima na patuduhon hasadaon ni roha di saluhut angka ulaon na dengan. Balga manang na gelleng ulaon, otik manang na godang sibagion molo sada ni roha na sian Jesus Kristus ido tapangke tontu ndang timbul angka pargolat golatan, parancitan ni roha, nang angka lan na asin. Ai hataridaan ni angka na porsea, ima sada ni roha, saroha sapingkiran(Roma.12:16).
2. ASA GABE TAU LAS NI ROHA NI DEBATA NGOLUNTA
Di hita dongan sahaporseaon, sada na hinirim ni Jesus Kristus asa di ondihon angka siseannai, asa tarida do nian las ni roha na sian Debata di ngolu ni angka sisean i(13b). Jala ido na hinirim ni Debata di hita nuaeng, ingkon do memiliki prinsip Iman saleleng mangolu hita di portibi on gabe tau las ni roha di Debata ma ngolunta, artina di angka ulaon na denggan ingkon do patuduon sada ni roha na sian Debata, di tonga tonga ni keluarga, ingkon do Mian Jesus Kristus na gabe uluan di keluarganta be, asa tupa sada ni roha sogon na nidok ni ende “marsiamin aminan songon lampak ni gaol, marsitungkol tungkolan songon suhat di rubean” sada manaon na porsuk, sada mandalani na sonang. Nang songoni do tong di tonga tonga ni huria, ia Huria i na pinajongjong ni Debata doi, Debata do raja ni huria i, Debata do gabe uluan ni huria i, jala hita on ma na gabe daging ni Kristus i, yang pastinya jika daging dan kepala di pisahkan maka akan mati. Ido asa di dok Jesus Kristus i “ndang tarula hamu manang aha anggo so mardongan ahu(Joh.15:5)” hasadaon ni roha na sintong sian Debata doi. Alani asa tarpatupa hasadaon ni roha di tonga tonga ni huria ingkon do saluhutna hita mian di bagasan Jesus Kristus. Jala sian hasadaon ni roha i gabe tau las ni roha ma ngolunta on di Debata. Jala ido na hinirim ni Debata asa sada nian sude ruas ni huria i (angka na porsea i) songon Debata sada dohot Jesus Kristus i. Jala pos do roha sian hasadaon ni roha ndang masa be angka paraccitan ni roha, ndang masa be angka na malas marminggu, ndang masa be angka na mengambil kepentingan masing masing jala ndang masa be angka na pinda pinda huria alani angka hancit ni roha. Alai songon goar ni minggu ta di minggu sadarion minggu Exaudi “ditangihon” ganup angka naung sada di bagasan Jesus Kristus idaonta ma lasniroha marhite na di tangihonon Debata tangiangta. Alan i sude ma hita manghangoluhon tangiang pangondianan ni Jesus Kristus i marhite hasadaon ni rohanta di ngolunta siganup ari. Dipasu pasu jala di pargogi Tuhan Debata ma hita Amen.
Pdt. Ardianus Situmorang S.Th
Tidak ada komentar:
Posting Komentar