JAMITA MINGGU VI DUNG TRINITATIS
07 juni 2024
Nats : Markus 6 : 1 – 13
Thema : Ta Jangkon ma Jesus Kristus di bagasan rohanta ganup
Patujolo : Di hita saluhutna angka dongan sahaporseaon, taringot tu na manjangkon Jesus Kristus, sian hasosorang ni Jesus i tu portibi on, nunga be masa penolakan bahkan perencanaan laho membunuh Yesus Kristus. Jala di na manghobasi pe Jesus Kristus di angka ulaonNa, sai jongjong do angka halak Farisi na mamaparsoadahon hadirion ni Jesus Kristus, torop do jolma na mansoadahon jala dang manghajongjongkon Jesus Kristus I anak ni Debata. Jala di turpuk jamita sadarion, di namasuk Jesus Kristus tu huta hatubuanna sandiri di tolak angka dongan sahutana do Ibana, jala di parsoada nasida do hadirion ni Jesus Kristus i. Alani asa unang masa sisongoni tu hita, marhite jamita di minggutta sadari on di podahon Debata do tu hita asa :
Thema : Ta Jangkon ma Jesus Kristus di bagasan rohanta ganup.
1. Songon dia do manjangkon Jesus Kristus i?
Hamu dongan sahaporseaon, nueng masuk ma hita tu minggu pa VI Dung Trinitatis, Trinitatis ima hasitolusadaon ni Debata, on do Debata na sintong jala Ibana do na manjadihon hita ima Debata Ama, anak, dohot tondi parbadia. Na mandok sada do Debata nang pe di bagasan 3 hadirion.
Alani do taringot tu na manjakkon Jesus Kristus porlu do ingkon antus hita manangkasi diri, songon dia do bahenonta laho manjangkon Jesus Kristus i?.
Adong do hata na mandok “ia molo di lului ho Debata hombar tu pingkitanmu Jumpangmu ma Debata songon na di pikkiran mi” sada pandohan na sintong do on bahwa di na laho manjangkon, lumobi ma mananda Jesus Kristus i hita, ndang margogo hita molo mangasahon pingkiran nang gogonta laho manghaporseai jala mananda Debata. Tabereng ma angka Ompu ta si jolo tubu, umbahen na di pauli nasida angka gana ganaan, manomba angka Hau na bolon jala mamele di atas ni angka kuburan, on ma angka haliluon na masa hinorhon ni angka pingkiran. Artina, gabe pingkiran ta on do mangarajai jala na manggora hita laho patupahon angka haliluon taringot tu na tahaporseai i, jala jotjot do dang sadar hita disi, sai tapikkir ma ido debata na tutu. Alani sada kepastian do i bahwa dang tolap ni pingkiranta on laho mananda jala mangalului Debata, alani ingkon botoonta bahwa saleleng tapangasahon pingkiranta nang gogonta laho mananda jala manghaporseai Debata ndang jumpatta Debata na sintong i, alani unang tapangasahon pingkiran nang gogotta, lumobi ma tahe ginjang ni roha maradophon Debata.
Molo tapamanat do namasa di turpuk jamita sadari on, di na masuk Jesus Kristus tu huta hatubuan na, sude do nasida mamparsoadahon Jesus Kristus i, jala didok nasida do, nda Ibana tukang kayu i, tubu ni si Maria?. Leas do roha ni angka natorop i, di panandaion nasida di Jesus Kristus i, ai tangkas do taboto bahwa molo di dok anak ni tukkang kayu berarti na laho patoruhon sangap ni Jesus Kristus i do I, jala molo sai sungkun sungkun nasida taringot tu huaso ni Jesus kristus i, sian dia haroro na, sada tanda doi bahwa dang sintong dope nasida mananda Jesus Kristus. Alani do naeng dohonon hata ni Debata do tu hita di ari sadari on, di na ro hita mandapothon Jesus Kristus, laho manjalo jala mananda di asi ni roha ni Debata ndang tama tapangasahon pingkiran nang gogotta lumobi ma tahe ginjang ni roha mandapothon Debata. Saluhut angka hagogon na adong di portibi on ndang margogo i pangkeonta laho mananda Jesus Kristus i. Jala taringot tu namamparsoadahon Jesus Kristus, sasintongna ndang holan na menolak Jesus songon na binahen ni angka dongan sahuta nai, alai paholanghon diri sian angka parsaoran na pinatupa ni huria pe, dang mangharingkothon parmingguan, sasintong na na menolak haroro ni Jesus Kristus i do hita disi nang pe so tadok sian pamanganta on, laos naung di bagas joro i pe hita, molo adong angka pangula naso mardomu tu rohanta gabe malas hita mandapothon Debata di bagas joro i, ndang haporseaon na sintong i, jala songon na biasa masa molo di na laho manangihon jamita sai olo hita kaluar masuk, dison ma di paingot Debata hita, sarupa do i na manolak Debata na jongjong marhite angka naposona pasahathon barita nauli tu hita. Alani, ingkon do antus hita di arti ni parminggu on i, ia molo masa Ibadah manang na parmingguon, berarti na jongjong do Debata di tonga tonga ni parmingguon i. Alani, molo gabe losok do rohanta jala tapadao dirinta sian angka parsaoran dohot Debata, tudosma i namanolak Jesus Kristus Kristus ido hita jongjong manang na masuk tu rohanta marhite angka hataNa nabadia i. Alani di na manjangkon Jesus Kristus i hita, unang taparsoada, jala unang tapangasahon gogo dohot pingkiranta laho mangantusi taringot tu hadirion manang na huaso ni Debata, alai tapaloas ma huaso ni Tondi porbadia i na mangajari jala mangarajai rohanta ganup marsada sada laho mananda Debata “ai holan tondi na sian Debata i do na tuk mampargogoihon hita laho mananda Debata na sintong i, lumobi ma mandok mauliate di sandok denggan basana”.
2. Asa tau hita marnida jala mandai hagogon ni Debata.
Angka dongan sahaporseaon, di na manjangkon jala manghaporseai Jesus Kristus i hita, ingkon do ta paunduk rohanta di adopan ni Debata, songon na didokna di arti ni Hata haporseaon ta na di ponggol pa III hon i “Na diparhatutu rohangku do, na so tarbahen ahu porsea di Jesus Kristus Tuhanku manang mandapothon Ibana, ianggo tung sian roharohangku manang sian gogongku sandiri, na dijou Tondi Parbadia i do ahu marhite sian Barita Nauli, dilehon do asi ni rohaNa patiurhon rohangku, diparbadiai do rohangku jala dipatongtong do ahu dibagasan haporseaon na ture, tudos tu na binahenNa i nuaeng tu saluhut halak Kristen na di tano on; ai dijou do nasida jala dipapungu jala dipatiur do rohanasida jala diparbadiai jala dipatongtong do nasida di Tuhan Jesus dibagasan haporseaon na sasada i jala na tigor i”. Alani tangkas ma ta antusi ianggo so tondi porbadia i hape na mangajari jala na mangarajai roha nang pingkiranta on, ndang jumpangta Debata na sintong i, alani tapaloas ma Tondi ni Debata mangula di rohanta ganup, asa di patiur di pargogoi jala di patubu haporseaon na sintong di hita, jala ido na mangajari hita mananda di denggan basa Debata, marhite sian ido toguonna ma hita laho marnida Huaso ni Debata na pamonanghon jala paluahon hita. Sude do hita naeng marnida hagogon ni Debata, jala sude do hita mangkirim asa sahat hita tu asi ni roha ni Debata, ima asi ni roha Nai naung paradehon surgo hasonangan i di hita. Alani tangkas do di ayat 5 i didok, molo tatulak do Jesus i sian rohanta ganup ndang na idaonta hagogon ni Debata, sotung masa be marmeam meam hita di na laho mangihuthon Jesus Kristus i, alai tatiop ma gomos haporseaon tai asa tau hita manjalo haluaon i.
Angka dongan sahaporseaon, songon parsuru ni Jesus Kristus di angka siseanNai, di suru do nasida borhat patorushon ulaon ni Jesus Kristus, jala di podai do nasida asa unang mamboan manang aha, laos ro di angka pangkean nasida pe. Ianggo sian hajolmaon ta on nian, molo tu dia hita mangalangka sai taparade do angka na ringkot, sian angka pangkean, taringot tu parmanganon, rodi sude angka na hombar di haborhatan i, alai dison ma di ajari Debata hita marpos ni roha holan tu Debata, jala marhite pos ni roha ido asa boi idaonta Huaso ni Debata na tuk manarihon ngolunta, jala sai ganupa ari do angka na denggan na uli di pamasa Debata di luar na tapikkiri holan manarihon hita ganup angka na marposniroha di Debata.
Alani mardomu tu turpuk jamita on, ndang suman hape hita marganggu ni roha laho manghaporseai Debata, ndang tingkos hape lomos rohanta jala ndang boi holan pingkiran ta on tapangasahon laho patupahon angka ulaonta, lumobi ma angka ulaon ni Debata na pasahathon barita nauli i. ianggo angka penolakan i, na sai ingkon masa doi songon an nialaman ni Jesus Kristus i, alai di angka na tongtong marpos ni Roha, sai donganan jala urupan ni Debata do. Alani asa sude hita marnida, mananda jala manghamuliatehon denggan basa ni Debata, unang ganggu be rohanta jala unang lomos rohanta, lumobi ma unang be sai tapangasahon pingkiranta on laho mananda di angka huaso ni Debata, alai taloas ma Tondi porbadia i, namangarajai jala na mampargogoi hita asa boi hita marnida jala mandai denggan basa ni Debata na tongtong manarihon ngolunta ganup.
Amen
Tidak ada komentar:
Posting Komentar