Minggu 25 – Mei - 2025
MINGGU ROGATE - Martangiang/Berdoa
EVANGELIUM : JOHANES 16 : 23 – 33
Patujolo : Sian sisi hajolmaon, lomos do roha ni ganup jolma molo marsirang dohot angka dongan lumobi ma tu sahalak na boi gabe pangunsadean di siganup tingki, laos di turpuk jamita on pe, gabe sungkun sungkun do roha ni angka sisean i di pandohan ni Jesus na didok Ibana satongkin nari nama dang idaon muna be au, dung tongkin nari muse idaon muna ma au. Alani marhite turpuk jamita on, di naung mate jala hehe Jesus Kristus sian hamatean i, tongtong dope biar ni roha i mangarajai hita ?. Marhite Tema ni jamitanta di minggu rogate sadari on, di podahon hata ni Debata do tu hita asa :
POS MA ROHAM NUNGA BE TALU PORTIBI ON DI BAHEN JESUS
1. HAPORSUHON DO JAMBAR NI GANUP NA PORSEA DI PORTIBI ON
Molo di adat batak, asal na targoar Jambar, na ingkon jaloon do i balga mananang na gelleng pe taho, jala ndang gabe mansalai i ianggo memang ido na boi tarpatupa. Alai molo so sahat tu hapeahanna jambar i, olo do masa rimas ni roha manang na parbadaan.
Marhite Evangelium di minggu rogate sadari on, naeng dohonon ni Jesus do tu hita “saleleng hot dope haporseaon ta tu Jesus Kristus i, na ingkon jaloonta do jambar na ro sian portibi on ima godang ni angka hasusaan alani Kristus Jesus i”.
Boi do hita menghindar sian hasusaan i?
Jala songon dia do bahenonta mangadopi hasusaan di ngolunta?.
Molo tapaihut ihut do angka na masa di ari parpudi on, godang do alani angka hasusaan gabe mansohot marhaporseaon tu Jesus Kristus, jala alani porsukni parngoluon pe torop do na gabe mardebata sileban, nang adong do tong na gabe pasidunghon hosanna ala so adong be dapotsa solusi di sitaonon i.
Di hita ganup angka dongan naung hinaholongan ni Debata. Di turpuk jamita sadari on boi do tabereng balga ni holong ni Jesus maradophon angka siseanNai (22), di paingot Ibana do asa unang mabiar, unang gabe mansohot nasida sian Jesus molo pe tung ingkon tumatangis nasida di bahen portibi on (20) gabe marserak nasida (32) nang marporsuk parngoluon nasida (33). Ai tangkas do hata ni Debata tu hita sadari on na mandok NUNGA TALU BE PORTIBI ON (Yoh.13:33;1 Yoh 5:4). Hamamate jala haheheon ni Jesus sian hamatean i ido na pataluhon huaso ni sibolis i. Jala ido na naeng patolhason ni Jesus tu angka siseanNai, ima taringot tu parsirangon satongkin dohot parjumpaan nasida muse(16). Siala ni hita pe unang be mabiar hita mangadopi ganup hasusaan na di portibi on alani Jesus Kristus (Mat.10:22), na martingki do sude nai, jala na lao salpu do i ai so adong hasusaan na manongtong (1 Pet.5:10), lumobi ma na ingkon pos do rohanta di Debata, siala boi do monang hita maralohon ganup angka hasusaan asal ma tongtong hita marhaporseaon na togu tu Jesus Kristus.Songon goar ni mingguta sadari on, minggu rogate na marlapatan ma i “martangiang” tangiang do na patut pangasahonon ni ganup angka na porsea molo ro angka sitaonon (Yak.5:16b), jala laos marhite jamita sadari on pe di lehon Jesus do sada kunci tu hita ganup angka na ro mangido marhite goarNa, ganup na tapangido i marhite tangiang naung sahat do na tapangido i tu Debata siala pos ni rohanta di Jesus Kristus i (27) jala tarjalo hita do gok las ni roha marhite gogo ni tangiang (24). Tangiang do gogonta laho mangadopi parungkilan, alani unang menghindar hita sian angka sitaonon na ro tu hita, ta adopi ma i dibagasan pos ni roha di Debata, ai margogo situtu do tangiang ni angka partigor molo di bagasan haporseaon dohot sabam ni roha (1 Tes.5:17-18).
2. NUNGA MARDAME BE HITA DOHOT DEBATA
Dung mate jala hehe Jesus Kristus sian hamatean i, gabe mangomo asi ni roha do hita sian Debata, ima asi ni roha di pardengganon, nunga be di pauli Jesus Kristus hubungan ni hajolmaon tu Debata sialani dosa ni jolma na parjolo i. Mudar dohot daging ni Kristus naung tarsilang i do padamehon hita tu Debata. Jala nunga be singkop tujuan haroro ni Jesus tu portibi on, ima paluahon ganup angka porsea di Ibana (Yoh.3:16).
Dung hehe Jesus sian hamatean i, pola do 40 ari nai Ibana di portibi on pataridahon huaso hadirionNa tu ganup angka sisean nai nang angka na porsea di janjiNai. Jala di turpuk jamita sadari on, di ajari Jesus do ganup angka siseanNai asa mulak marlas ni roha nasida, ai nunga salpu be tangis dohot arsak ni roha nasida di tingki na mate Jesus i. Songon sada gombaran na binahen ni Jesus ima, songon boruboru namanubuhon posoposo, salpu do holso jala na hansit i dung sorang poso poso i. Laos tu hita pe, marhite naung hehe Jesus Kristus gabe sintong ma hita di adopan ni Debata, ai tarpatupa do di hita ngolu na imbaru, ima ngolu na ginnohan ni tondi naung pinauli jala sinahaphon ni Debata di hita marhite hamamate nai. Jala na patutna na ingkon las do rohanta.
Marhite turpuk Jamita on, laos di patolhas Jesus do tu angka siseanNai taringot tu hadirionNa, sada do Jesus dohot ama i, jala di dok Ibana do di hataNa ia dung borhat Jesus i manadinghon angka siseanNai na ingkon ro do muse na gabe pandongani di nasida nang di hita ima Tondi Porbadi naung tajalo marhite pandidion nabadia i (Yoh. 14:16), jala nunga maringan Tondi Porbadia i di ganup roha ni angka na porsea. Mangolu jala marhuaso do tondi porbadia manogu nogu hita molo sai tongtong olo hita pajonokhon diri tu Debata marhite panjahiaon di hataNa. Ai tangkas do jamita sadari on paingothon tu hita, marhite hataNa na mandok nunga be boi hita martangiang secara langsung tu Debata (26), siala nunga di padomu Jesus i hita tu Debata (Rom.5:1), ima na pinadomu ni Jesus Kristus marhite mudarna(27).
Sialani i, nunga be singkop di taluhon Jesus Kristus i portibi on. Jala nunga be dohot hita di pamonang marhite asi ni rohaNa. Unang be mabiar jala lomos hita mandalani ngolunta di portibi on, tongtong ma pos rohanta di Debata.
Laos marhite goar ni minggunta sadari on, ima minggu rogate (martangiang) anggiat ma tutu gabe sipartangiang hita saluhutna. Songon na nidok ni Dr. Martin Luther “tarida do haporseaon sian isi ni tangiang, jala didok do muse, tangiang do hosa ni ganup angka na porsea”. Na marlapatan mai, dang boi dohononta hita na porsea ianggo so si partangiang hita.
Ta ingot ma tongtong poda ni Jesus na parpudi tu angka siseanNa ima “martangiang dohot amanah Agung ni Jesus Kristus” (Mat. 28:19-20). Tapungka ma ngolunta siganup ari di bagasan tangiang jala lam taharingkhothon ma mangulahon angka parange na imbaru ima angka pangalaho na ture sian haporseaon. Amen !
Dituliskan oleh :
Pdt. Ardianus Situmorang S.Th
Resort Jetun Nagoya Pelita VII Batam
Tidak ada komentar:
Posting Komentar