Jamita Minggu XXV Setelah Trinitatis - Markus 13 : 1 - 13 - Tongtong ma setia hita managam di ari haroro nai

                                  Jamita Minggu XXV Setelah Trinitatis

Nats        : Markus 13 : 1 - 13

Tema      : Tongtong ma setia hita managam di ari haroro nai

Patujolo : Angka dongan sahaporseaon, molo marningot hita di 2.000 taon naung salpu. Di na laho manaek Jesus tu banua ginjang dung hehe sian hamatean i di podahon Jesus do na ingkon ro do Ibana muse tu portibi on laho paujunghon portibi on, jala mamboan ganup angka na porsea tu surgo hasongan i. Alani molo tapaihut ihut do namasa di portibi on, tamba ari, tamba bulan jala tamba taon, tung mansai gabe ngali do parbue ni haporseaon jala hataridaanna pe lam tu jahatna do angka Jolma na di portibi on, alani i angka ise do hape na sahat tu surgo hasonangani di ari parpudi?. Jala songon dia do hita paima imahon haroro ni Jesus naso takkas ta antusi sadihari Ibana ro?. Marhite jamita di minggu XXV dung Trinitatis di ari sadari on di paingot hata ni Debata do tu hita asa :

Tema : Tongtong ma Setia hita di bagasan Haporseaon managam di ari haroro nai.

1.   Jaga ma hita asa unang di liluhon huaso ni portibi on

Angka dongan sahaporseaon molo taihuthon do namasa di turpuk jamita on, tingki na di huta Jerusalem Jesus dohot angka sisean_Nai ro do sahalak sian sisean ni Jesus pasahathon aha na ni ida simalolongna di bagas joro i jala mandok tu Jesus naso jadi be munsat manang na sega angka bagas na di huta Jerusalem ala ni uli jala tongam ni angka jabu i. Alai ro do Jesus mandok “ndang pasombuon nanggo dua batu martindi”(2). Maol do di antusi sisean i, sasintongna alus ni Jesus i. Siala ni i molo tarimang-rimangi sungkun sungkun ni sisean ni Jesus dohot alus ni Jesus i. Hita pe jot jot do tardapot merasa salut di angka kemegahan-kemegahan na di portibi on, jala alani angka hagogoon na di portibi on pe olo do sipata gabe sai tapikkir naso salpu be portbi on sehingga mambahen hita merasa nyaman jala ndang porlu be mangharingkothon Jesus Kristus i. Sai tapikkir do angka haulion jala hagogon na di portibi on boi tapangasahon umbahen na jo jot hita mangasahon pingkiran jala hagogoon ni portibi on, jala angka on do na jot-jot mambahen hita gabe lupa tu Debata. Alani di turpuk jamita on, tung gomos do di paingot Jesus i, ianggo di haroro nai na ingkon salpu do sude na di portibi on.

 

Di minggu pa XXV dung trinitatis sadari on, gomos do hata ni Debata manaringoti tu hita taringot tu ujung ni portibi on. Ianggo ujung ni portibi on na ingkon masa do i, alai taringot tu masa na manangna tingkina ndang adong manang na ise umbotosa sadihari masa i. Jala sisean ni Jesus Kristus i pe ndang di boto nasida andigan masa i (4). Di turpuk jamita sadari on di patolhas Jesus do tu angka si sean Nai taringot tu tanda haroro ni Jesus i. Di paingot Jesus do angka sisean Nai nang hita di ari sadari on asa “Jaga ma hita, asa unang di liluhon angka parjamita pargapgap manang na parpoda haliluon”(5). Molo tabereng do namasa di ari parpudi on, marlomba lomba do angka jolma laho pajongjonghon huria na imbaru. Jotjot do alani angka perselisihan gabe jongjong huria na imbaru “na ni onjar ni accit ni roha gabe jongjong huria na imbaru”. Jala nunga be lam tumorop nuaeng pajongjonghon huria laho mangomo di angka arta portibi. Alani i boi dohonon sada kegagalan do on di tonga tonga ni halak karisten jala sada tanda do on bahwa nga bangkol be jolma laho mandok angka aha na tingkos lumobi ma mangulahon jala mangihuthon angka na denggan. Taringot tu parjamita pargapgap manang na pengajar sesar, nunga lam torop be jongjong nuaeng jala angka na manggadis hata ni Debata pe marhite na mempertontonhon parbinotoan di media sosial nunga lam tumorop, na mambahen nasida gabe mangasahon bisuk dohot pingkiran sambing laho mangantusi hata ni Debata. Alani i, asa unang gabe talu jala gabe madabu hita tu angka haporseaon naso tingkos i, ingkon do taharinggashon manjaha hata ni Debata. Marsiajar taringot tu hata ni Debata.

 

Tung mansai torop do angka tanda na pinasahat ni Jesus taringot tu ari haroro nai, na ingkon masa do angka parporangon baik antar suku tu suku, negara tu negara. Jala hinorhon ni angka parporangon ipe masa ma angka kelaparan, hasusaon dohot lan angka na asing. Sudena on nunga be masa nuaeng, lumobi ma na masa tabereng di parpudi on “perang antar Israel dan Palestina” jala sahat do nang tu hita imbas ni angka parporangan i. Alani i, marhite angka na masa on naeng do nian ingkon jaga hita ganup, jala ingkon do hobas hita paradehon rohanta marhite haporseaon na togu(9). Na ingkon ro do Jesus Kristus i na padu halihon tu portibi on, alai ianggo taringot tu tingkina ndang adong ise na umbotosa, alani holan haporseaon do na porlu pangasahononta jala tahangoluhon di ngolunta. Molo pe tung porsuk sitaononta di portibi on, songon na didokna di ayat 11 di pasahat hita tu angka parjehe, manang na di perhadaphon dohot angka naso porsea tu Jesus Kristus. Ingkon do tongtong hita hot di bagasan haporseaon. Molo pe gabe di hasogohon manang na di hosomi (13) hita alani Kristus Jesus i, sotung gabe holsoan jala talu hita alani angka namasa i. lam matua portibi on lam tu jahatna nama jolma, alani molo pe masa i, anggiat ma gabe lam pahothon haporseaon ta i.

 

2.   Asa di palua hita jala dapotan asi ni roha

Haluaon di ganup angka na porsea nunga di patupa Jesus Kristus be marhite naung mate jala hehe Jesus Kristus i manaluhon hamatean. Sialani ganup hita angka na porsea naung dapotan haluaon do hita sian gomgoman ni dosa hamatean i(Rom.6:23) marhite haporseaon. Alani, di ngolunta siganup tingki ingkon boi do hita gabe habaoran ni pasu-pasu di sandok angka dongan, songon na nidok ni Debata tu si Musa, gabe bangso na bolon jala siboan pasu pasu tu sandok jolma(1 Musa  12:2-3). Ganup hita angka na porsea ingkon do siboan barita lomo ni roha ni debata songon na nidok ni apostel paulus tu huria Korintus, ganup angka na porsea ingkon do gabe sihatindangkhon Jesus Kristus i(2 Kor.3:3), jala di turpuk jamita sadari on pe tangkas do di dok Jesus tu angka siseannai “alai ingkon jumolo do baritahonon barita na uli i tu ganup bangso”(10) ima barita taringot tu Jesus Kristus.

 

Di na mamaritahon barita taringot tu Jesus Kristus i hita, sasintongna ndang na ingkon tu dia hita borhat ingkon taboan Bibel jala tahatahon. Alai songon na nidok ni apostel paulus tu huria Korintus(2 kor 3:3), ingkon do sian ngolunta siganup ari boi hita mamaritahon taringot tu Jesus Kristus, marhite pos ni rohanta di Debata jala marhite holong ni rohanta maradophon angka donganta jolma. Memang molo holan sian hajolmaon ta on do ndang tarbahen jala tarulahon hita mangulahon angka na denggan hombar tu lomo ni roha ni Debata ianggo so marhite Jesus Kristus i(Yoh. 15:5). Alani tajalo ma gogo sian Debata, pargogoionna do hita mangulahon hata nai lumobi ma mamaritahonsa tu ganup angka jolma. Jala di marhite jamita di minggu sadari on pe di ayat na pa 11 hon di dok do tondi porbadia ido annon na mangajari jala na mampargogoi hita. Alani hobas ma hita, tongtong ma hita setia di bagasan haporseaon, ai ido tanda ni angka na managam di haroro ni Jesus Kristus i, jala holan di angka na managam di haroro nai do na dapotan asi ni roha. Amen.

 

 

Pdt. Ardianus Situmorang S.Th