Pangarimpunan Jamita Partangiangan Keluarga
Nats : Ibrani 10 : 11 – 25
Patujolo : Angka dongan sahaporseaon, molo tarimang
rimangi do di pardalanan ni ngolunta, sasintongna tudosni holong ni Debata maradophon
jolma pardosa ndang adong jumpangta di hajolmaon. Jala holong ni Debata tu hita
jolma tung mansai balga hian do “ndang tardodo”. Barita taringot tu holong ni
roha boi do gambarhonon songon holong ni Natoras na burju maradophon ianakhonna,
jot-jot do alani bandal ni angka gelleng olo gabe di pungkul natorasna angka
gellengna jala di patupa ma hukuman na tarjalo tu roha. Alai dung salpu angka i,
hampir sude do angka natoras mangido ampun tu Debata alani angka pambahenan
nai, jala sasintongna gabe angka natoras ido muse na mangelek angka ianakhon i.
– Di na di tompa Debata jolma na parjolo i, tudos do tu rupa dohot pangalaho ni
Debata. Alai dung madabu jolma i tu bagasan dosa gabe sega do citra manang na
rupa ni Debata na di jolma i hian, jala ido umbahen na di palao Debata jolma i
sian porlak Eden i. Jala marhite namasa i boi do botoonta ndang gabe manongtong
rimas ni Debata jala dang marpangkurangi
holong ni roha ni Debata tu hita ganup angka jolma. Alani marhite jamita di
partangianganta di borngin on di paingot Debata do hita marhite tema ni
jamitanta na mandok :
Tema : Nunga di hongkop Debata hita
marhite Jesus Kristus
1. Di pelehon do dirina tu hamatean humongkop pardosa
Angka
dongan sahaporseaon, molo ta ingot do angka na masa di padan na robi, tung
mansai jotjot do bangso Israel patupahon pelean tu Debata marhite angka
persembahan korban Syukuran laho manjalo hasesaan ni Dosa, nang songoni pelean
las ni roha tu Debata. Jala angka ido ulaon ni malim(Pandita) di padan na robi “patupahon
pelean tu Debata” (11). Jala marhite turpuk jamita di borngin on ingkon
antusanta bahwa di sude angka pelean na pinatupa nasida i ndang boi holan
marhite i sambing pasaehon dosa ni jolma i.
Alani i, marhite jamita partangianganta
di borngin on di paingot Debata do tu hita asa mananda hita di holong ni Debata
naung pinatupana di hita ganup angka jolma pardosa. Ia pelean na pinatupa ni
angka malim di padan na robi ndang boi i pasaehon dosa hamatean i, na
marlapatan ma i di tingki madabu tu bagasan dosa laos di patupa ma pelean jala
holan dosa di tingki ido na sesa molo tung di jalo Debata pelean nai, siganup
tingki do hita madabu tu bagasan dosa, jala ndang tarpatupa jolma manesa dosa i
marhite gogo nang pambahenanna. Sialani ido umbahen gabe Debata sandiri do
sasintongna napasaehon dosanta angka na porsea marhite mudar ni Jesus Kristus i.
Mate jala hehe do Jesus Kristus i sian hamatean manaluhon dosa hamatean i. Tung
arga situtu do hita di tobus, mudar ni Jesus Krisus ido na tau gabe pelean na ummuli
jala na pasaehon dosa ni ganup angka na porsea (14). Jala marhite mudar ni
Jesus Kristus i, dang masa be hita mamelehon angka pelean situtungon laho
manjalo hasesaan ni dosa sian Debata. Nunga tung mansai balga hian holong ni
Debata tu hita, jala di hongkop Debata do hita marhite mudar ni Jesus Kristus i,
ai mudar ido na padamehon hita dohot Debata si parholong roha i. jala Mudar ni
Jesus ido na patupahon haluaon di hita. Alani pambahenan ni Debata di hita,
songon dia nama na patut ulahononta, aha do bahenonta balos ni denggan basa ni
Debata i?.
2. Alani i tahamuliatehon ma tu Debata marhite serep ni
rohanta di Debata
Angka
dongan sahaporseaon, molo mananda hita di asi ni roha ni Debata nda na patutna
ma nian ingkon mandok mauliate jala marlas ni roha hita di lauaon i?. Jamita di
partangianganta di borngin on gomos do paingothon hita asa sude ma nian hita
hobas jala manghamuliatehon denggan basa ni Debata. Di jamita ta di minggu
naung salpu di paingot Debata do hita asa tongtong hita mamelehon dirinta gabe
pelean na mangolu tu Debata. Laos di jamita di borngin on pe sasintongna ido na
naeng dohonon ni Debata tu hita asa unang tapaholang dirinta sian Debata. Ingkon
do unang tatadingkon angka parpunguan ni halak na porsea songon na nidokna di
ayat 25 i. Jala ingkon do tontong mian hita di bagasan holong na sian Debata,
marhiite na olo marsiantoan, marsianju anjuan, lumobi ma marsipajujuan tu haholongan
dohot angka ulaon na denggan songon na didokna di ayat 24. Alani i gomos ma
tatiop pangkirimon i, ai pangkirimon ido na gabe haposanta laho manjalo asi ni
roha i.
Sialani i marhite turpuk jamitanta di
partangianganta di borngin on sude ma hita marlomba lomba mangulahon na denggan
hombar tu ulaon ni tondi porbadia na mian di hita, jala ima tongtong na
pataridahon kualitas ni haporseaonta, na sintong do hita maima ima di ari
haroro nai, ai tangkas do di ayat 25 i didok nunga be lam jonok ari haroro nai,
alani tama taparade rohanta, tapagalak palitonta manomu haroro ni Jesus Kristus
i. Amen!
Pdt.
Ardianus Situmorang S.Th
Tidak ada komentar:
Posting Komentar