JAMITA MINGGU I DUNG EPIPHANIAS 12/01/2025
LUKAS 3 : 15 – 22
Patujolo : Angka dongan sahaporseaon panjahaion di turpuk jamita sadari on, sasintongna na maima ima do bangso Israel di sahalak raja, ai nunga tung leleng nasida manghirim na ingkon ro do Raja napaluahon nasida sian gonggoman ni bangso rom. Di tingki na jongjong si-Johanes pandidi marbarita nauli sai di pikkir nasida do Jesus i ibana siala ni huasona di angka panurirangonna. Jala molo tapatudos do tu na masa nuaeng di portibi on, nunga tung leleng hita maima ima di haroro ni Jesus si palua i tu portibi on, di pardalanan ni ngolu on jotjot do alani gogo ni angka huaso na di portibi on, jala alani dokdokni sitaonon di ngolunta, lumobi ma di angka pamaritaon na maralo tu Debata gabe ganggu rohanta taringot tu Jesus na naeng ro i. sialani i marhite turpuk jamita on di podahon do tu hita :
Thema : JESUS DO ANAK HAHOLONGAN NI DEBATA
1. TAJANGKON MA JESUS KRISTUS I
Di hita saluhutna angka dongan sahaporseaon, torop do hita manghatindanghon bahwa Menunggu adalah hal yang sangat membosankan.
Marhite turpuk jamita on, boi do dohonon sasintongna nunga apala tung leleng bangso israel na marsitaonon, jala di bagasan na marsitaonon i nasida sai manghirim do nasida anggiat nian tumibu ro raja Israel na paluahon nasida sian angka sitaonon nasida i. Tarpaima do nasida jala memang sada ulaon na mansai borat do na paimahon, lumobi ma paimahon di bagasan sitaonon na dokdok. Sian hajolma on ta on, sai jotjot do hita madabu tu bagasan dosa alani angka na paimahon, isarana paimahon angka dongan tu angka ulaon, paimahon angka dongan di bagasan siubeon naung male, jala taringot tu na paimahon haroro ni Jesus Kristus i, jotjot do tubu ma di rohanta sai gumira ma nian ro asa salpu angka sitaonon, jala alani dokdokna angka sitaonon i sipata gabe tubu ma lomos ni roha taringot tu Jesus Kristus i.
Di na jongjong si Johanes pandidi manurirangi, torop do bangso israel na manghirim si Johanes do Jesus na naeng ro i (ayat 15), jala sasintongna andorang so sahat tu turpuk jamita on, nunga be manurarangi si Johanes, asa ganup jolma ingkon olo paubahon rohana jala mamparbuehon angka na tama di ngoluna (8). Alai tung maol do di tanda bangso israel, ise do sasintongna si Johannes, jala ido umbahen na di patangkas nasida songon na di ayat 15 i, alai ro do si johanes mangalusi na ingkon ro dope di pudina na gumogo sian ibana, jala di hatindanghon ibana do i “na hurang tama do ibana mangharhari tali sipatuna”. Marhite pandohan na on nda ingkon lam pos ma nian roha ni angka bangso israel taringot tu haroro ni Sipalua na naeng ro i ?. Hataridaana, di jangkon nasida do nian Jesus i, alai dang leleng nai “hurang lobi 3 taon” nunga parsidohot nasida na mamparsoadahon Jesus i jala na mandok parsilanghon Ibana, sada gombaran jala singot singot do on di hita, ia hajolmaon i, di pengakuan, sifat dohot lan angka na asing sai na muba uba do, alai marhite turpuk jamita on di hirim Debata do asa roha dohot pengakuan ni angka na porsea i ingkon hot do sahat ro di ujungna (Wahyu 2:10) jala ido ulaon ni tondi porbadia i umbahen na di lehon mian di rohanta ganup.
Alani, marhite jamita di minggu parjolo Epiphanias sadari on, tangkas ma hita mangantusi ia tujuan utama haroro ni si Johannes pandidi ima patulushon sangkap di Debata manang na misi ni Debata laho paradehon dalan di haroro ni Jesus Kristus (Jes.40:3-5), paingothon saluhut angka jolma asa sude olo paradehon diri marhite hamubaon ni roha (Pertobatan), mangolu di bagasan hamubaon ni roha (Luk. 3:8). Marhite turpuk jamita on, boi do antusanta tung mansai tigor do di patutimbo si Johanes ia Jesus Kristus na naeng ro i sintong do Ibana anak ni Debata, ai tangkas do di surirangkon Ibana bahwa Jesus Kristus na naeng ro i gok huaso do Ibana di saluhut jala di patolhas do tu bangso Israel na ingkhon Jesus Kristus i do manirang ganup angka na manjangkon dohot naso manjangkon Jesus sipalua i, jala Ibana do muse mamboan angka na marpangoloion di hatana ima angka na pantas roha laho masuk tu hangoluan na saleleng ni lelengna, jala angka naso manjangkon i tu api na so ra mintop, ima na ginoaran api narokko (17).
Di pangkobasion na i sintong do ibana mangulahon ulaon na i “barani mandok angka na sintong”, alai baliksa do na masa tu ibana, tung pe angka hasintongan i do na binaritahonna, gabe sogo do roha ni si Herodias alani na pinaingotna dang sintong ibana marroha-roha tu raja Herodes. Molo tapatudos do tu namasa nuaeng, jotjot do gabe masa angka perselisihan, bahkan paraccitan ni roha di angka pardonganon ala ni habaranionta manghatindangkon hasintongan, alai dison ma ingkon do ta tantusi bahwa parbue ni hamubaon ni roha ingkon do barani manghatindangkon angka na sintong, ingkon do adong hataridaan na bahwa na toho hita namarpos ni roha di Debata, lumobi ma “Barani manghatindanghon na sintong ingkon gabe sada motto do i di hita na maima ima di haroro ni Jesus Kristus i, manghatindanghon marhite pamangan songoni nang di parulaon” jala ima tanda ni angka na olo paubahon roha di ngoluna siganup ari (Luk.3:8). Ingkon do olo marbagi tu angka na hurangan (Luk.3:11,13;Gal.6:2;Matius 22:39). Jala marhite turpuk on di paingot do hita bahwa di angka hita naso olo paubahon roha na gabe ambolong do muse tu api narokko i (Luk.3:9,19; Mat.7:19), siala ni i olo ma hita ganup paubahon roha jala ta haporseai ma sintong do Jesus Kristus I anak ni Debata.
2. AI IBANA DO SIPALUA SANDOK JOLMA
Marhite turpuk jamita sadari on, ima na margoar minggu parjolo dung Epiphanias, Epiphanias na marlapatan ma i Hapapatar-Penyataan aha do na naeng berengon ta marhite turpuk jamita on, jala di dia do letak ni penyataan i?.
Molo tangkas do nangkin ta jaha ima di ayat 21-22 “Ho do anakku haholongan i; lomo do rohangku di ho”. Ia pandohan on sasintongna soara ni Debata do i na papatarhon tu sandok portibi on, lumbi ma tu hita nuaeng mandok ta oloi jala ta haporseai ma Jesus Kristus sipalua i, ai sintong do Ibana anak ni Debata, jala Ibana do na tuk paluahon hita sian dosa hamatean i.
Di na tardidi Jesus Kristus, perkiraan di umur 30 taon, sipata memang tubu do sungkun sungkun di roha ni angka jolma lumobi ma angka horong ni na so porsea “ai aturanna do ganup na mardosa ingkon do paiason manang na di tahirkan”. Alai marhite turpuk jamita on naeng do ingkon antusanta jala ta haporseai, ndang na alani mardosa Jesus Kristus i asa tardidi Ibana, alai asa singkop do sude di gonophon angka naung sinurirangkon ni angka panurirang i jala ido tujuan haroro ni si Johanes tu portibi on paradehon dalan, jala asa saut na sinangkapan ni Debata taringot tu haluaon ni Jolma (Korintus 5:21; Galatia3:13; Heber 4:15; Pipipi 3:9). Ai marhite pandidion ni Jesus Kristus i do di papatar Debata tu portibi on sintong do Jesus Kristus anak ni Debata “Ho do anak haholongan i; lomo do rohangku di ho”.
Sialani i, di hita saluhutna pe porlu do nang hita manangkasi dirinta ganup, sahat tu dia do nunga nuaeng pangantusionta umbahen na tardidi hita. Ai torop dope nuaeng sian tonga tonga ni halak Kristen na mandok molo tardidi ianakhonna “selamat ma di ho anaha nungnga tutu mangalap goar ho sadari on sian bagas joro ni Debata” di angka pandohan si songon on, tardapot do naso singkop dope hita mangantusi aha pandidion, sasintongna alani dosa dohot alani ringkot ni haluaon do asa ingkon tardidi hita jolma, on ondolan na umbahen ingkon tarididi ganup angka jolma jala ido na patandahon na mangakku hita angka jolma pardosa di adopan ni Debata jala ta haporseai di Ibana do haluaon i, jala si Paulus sandiri pe di hatindanghon do tu huria Roma naso adong be jolma di portibi on na tingkos sude nungga mardosa (Roma 3:23). Ingkon sadar do hita di dosa i jala ido umbahen na ringkot hita manjalo pandidion i, ai ido dalan parhitean ni Debata manolukhon ngolu na imbaru tu hita ganup angka jolma, asa dapot hita haluaon marhite hasesaan ni Dosanta. Jala taringot tu pandidon jotjot do hita, nang angka huria na asing pe torop dope na manolak pandidion tu angka dakdanak, alai songon hita huria Lutheran ta haporseai do nasa jolma, na di bagasan bortian, poso poso, dakdanak, ro di angka na magodang angka pardosa jala na ringkot do pandidion. Alani do di pengakuan ni Konfesi augsburh na ta haporseai i, di artikel na IX “na marguna do pandidion i tu haluaon parhitean manjalo asi ni roha sian Debata, alani do ganup angka DAKDANAK ingkon do sididion. Jala tatulak do sude angka pangajarion nang angka huria naso manjangkon pandidion ni angka DAKDANAK ima na ginoaran kaum Anabaptis”. Sialani i, di turpuk jamita on tangkas do di dok si Johanes “didihonon ni ido tu hamu tondi porbadia dohot api” ta hamuliatehon ma i, ai nunga be sahat tu hita asi ni roha ni Debata marhite pandidion naung ta jalo i, jala nunga be sude pangisi ni bagasta gabe targoar anak ni Debata angka si partohap di surgo hasongan i, alani ringkot ma siganup ari marningot hita di pandidion i, na gabe sada tanda di hita asa ganup tingki ma hita manolsoli di angka dosa songon na nidok ni si johanes “mian di bagasan hamubaon ni roha” (Lukas 3:8).
Sialani i, angka dongan sahaporseaon, unang be ganggu jala mar-lomos ni roha hita taringot tu Jesus Kristus i, molo di bagian na parjolo nakkin nunga tangkas di patolhas si johanes taringot tu huaso ni Jesus Kristus, ima na di ayat “16-17” di tanganna do purpuran, paiasonna ma pardegeanna: papunguaonna do emena tu sopona, alai tutungonna do hurangkam i tu api na so ra mintop. Nunga masa be asi ni roha i, ai nunga mate Jesus Kristus i di hau pinorsilang, ja Ibana mamuri hita sian dosa hamatean i marhite mudarna. Nuaeng nunga be di goari hita anak haholongan ni Debata angka naung ni asian ni Debata. Di hirim Debata do asa sude hita tongtong ma mian di bagasan pos ni roha ja marhaposan situtu di Debata, ai nunga patar be holong na i tu hita saluhutna, ta haporseai ma Jesus Kristusi, jala pos ma rohanta di Debata. Amen
Pdt. Ardianus Situmorang S.Th
Tidak ada komentar:
Posting Komentar