JAMITA MINGGU JUDIKA
Luluhon ma ahu ale Debata Jahowa
Evangelium : Lukas 20 : 9 – 20
Patujolo : Di hita saluhutna angka dongan sahaporseaon, mauliate ma dohononta tu Tuhan Debata nunga sahat hita tu minggu Passion na pa 5 hon ima di minggu Judika sadari on na marlapatan mai “Luluhon ma ahu ale Debata jahowa”. Molo tangkas tarimang rimangi di turpuk jamita naung tajaha di ari sadari on, sahat tu sadari on sasintongna masa dope penolakan penolakan taringot tu angka na mamaritahon barita nauli lumobi ma na paporsuk porsukhon ngolu ni angka parbarita nauli na tulus roha, sialani marhite Evangelium di minggu sadari on, di paingot Debata do tu hita asa unang tatulak angka parbarita nauli, sialani i :
Tema ni jamitanta di ari sadari on mandok : TAJANGKON MA ASI NI ROHA NA SIAN DEBATA.
1. Nasa na manulak jala maralo tu Debata na laho mago do
Angka dongan sahaporseaon, molo tajaha do turpuk na parjolo na di bindu 20 on, tangkas do di surathon disi “ro do angka natorop dohot angka siboto surat nang angka panungganei marsukkun tu Jesus taringot tu huaso na adong di Jesus Kristus i. Ianggo angka siboto surat dohot angka malim sasintongna ndang dope tingkos panandaion nasida taringot tu Jesus Kristus, jala ndang di haporseai nasida Jesus i anak ni Debata, panandaion nasida taringot tu Jesus holan sian hajolmaon sambaing dope nang pe nunga sai mangajari Jesus marhite huasona dohot patupahon angka halongangan di adopan nasida.
Ia Jesus Kristus sintong do i Anak ni Debata jala Debata sandiri do Ibana. Sialani i, di na ro angka natorop dohot malim dohot siboto surat na marsukkun tu Jesus, di antusi Jesus do ganup roha ni angka jolma i, jala di boto Ibana do angka aha namasa taringot tu angka pangalaho ni ganup Jolma, lumobi ma di penolahan ni nasida taringot tu angka panurirang na jongjong mamaritahon hasintongan i.
Sialani do di turpuk jamitanta sadari on, di bahen Jesus do sada parumpamaan taringot tu angka pangalaho ni angka malim dohot siboto surat di panulakion nasida tarngot tu barita ni Jesus Kristus i. Marhite umpama na pinasahat ni Jesus i, tangkas do tardapot angka si tulak parbarita nauli do angka halak siboto surat songoni nang angka halak malim i. jala dung di patolhas Jesus umpama i gabe tarrimas do nasida jala pola sampe marsangkap nasida laho manangkup Jesus.
Molo tapatudos do tu angka pardalanan ni huria di ari parpudi on, jotjot do nuaeng masa angka pargulutan di tonga tonga ni huria, jala jotjot do masa angka parbada badaon di tonga tonga ni pangula ni huria na mambahen gurgar huria, songoni nang di angka penolakan ni angka parbarita nauli manang na Pandita dohot angka pangula na asing. Jala hombar tu namasa nuaeng nunga lam tugodangna be angka pangula di porlak anggur i na gabe uasan di arta – gabe penguasa songon pandohan ni umpama i, pamatehon anakhon ni parporlak anggur i asa gabe nasida na marhuaso di porlak anggur i. Sitongka gabe panguasa di uagasan ni Debata, jala naso patut ulahononta do i, ai hamamago do ujung ni angka na mangulahon sisongoni songon na nidokna di ayat 16.
Alani aha do na patutu ulahononta di na tarpillit hita gabe si ula porlak anggur i ?.
Na parjolo : Saleleng di hasiangan on, ianggo sai tongtong do merasa unsintongan hita sian na asing. Lumobi ma ragu taringot tu huaso ni Debata di sasahalak jolma, songon angka halak siboto surat na manulak angka panurirang, songoni nang na ro nasida marsukkun taringot tu huaso ni Jesus i, tung so jadi ulahononta do angka sisongoni, ai molo masa i disi do lam di pakke sibolis i roha ni jolma gabe si panusai di angka huria manang na di porlak ni Debata, siala ragu di huaso ni Debata, nang di angka penolakan taringot tu Jesus Kristus.
Na paduahon : Taringot tu angka na mangula di porlak ni Debata. Saleleng di pangke Debata hita mangula di porlak ni Debata manang na di Huria sasintongna ndang adong hak ni angka na mangula i gabe panguasa di atas ni porlak ni Debata, alai na patutna ingkon ulahonon “saleleng di lehon Debata tingki dohot gogo lumobi ma bisuk “ ta pangke ma i gabe siboan Dame na sian Debata, mangula sian bagasan roha na tinogu ni Tondi ni Debata.
Sialani i, ingkon sipaholangon do angka pandohon na mandok : anggo dang Alani ahu, angka parroha sisuan bulu na mampertahanohon angka pambahenanna songoni na mengangung agunghon angka na pinatupana di huria, lumobi ma angka roha na naeng mangarunduti parhepengon ni huria.
Na patoluhon : Ganup angka pangula ni huria, nang sude angka parhobas ingkon do tunduk tu Debata nampuna porlak i, siala ni i sae ma ulaonta holan paune unehon huria i, unang gabe siambati di angka perkembangan lumobi ma pangambati di angka hamajuon ni parbaritaon na uli. Ai tu hamajuon i do hita di jou Debata.
Alani marhite turpuk jamita on, di dok Jesus do “Marosak ma ganup na tinggang tu batu on, jala magopu ma ganup na tininggangna 18” na marlapatan ma i, Batu i na manggombarhon tu otoritas hadirion ni barita nauli taringot tu Jesus sebagai pondasi ni ganup na porsea, sialani i ganup na manulak asi ni roha na sian Debata marhite barita nauli, na managam hamamago ma i, jala na mandao sian asi ni roha marhite pamaritaon di barita nauli na magopo ma muse ujung ni ngoluna sian hasiangan on.
2. ALAI NA MANJANGKONSA GABE DAPOTAN LAS NI ROHA
Marhite goar ni minggunta sadari on, ima minggu Judika “Luluhon ma ahu Ale Debata Jahowa” sintongna mangolu hita di hasiangan on, nunga be di luluhon Debata Jahowa hita marhite Hamamate ni Jesus Kristus, tarpatupa Debata do di hita asi ni roha ima di ganup na manghaporseai Jesus Kristus, ima taringot tu barita hatutubu ni Jesus, hamamate dohot haheheon na sian hamatean i. Nungga di lehon Debata be tu hita keadilan marhite hamamate ni Jesus i, ima hajongjongan ni asi ni roha di ganup na manghaporseai hamamate jala haheheon ni Jesus Kristus na patupahon hasesaan ni dosanta.
Alani molo tung di paingot hata ni Debata hita di ganup angka hahurangonta sotung gabe tarrimas hita. Jala molo tung di lehon Debata tu hita angka pangkobasi di angka parbarita na uli, tajangkon ma i di bagasan las ni roha dohot dame ni roha songon manjangkon Jesus Kristus sipalua i. jala taingot ma, ganup na olo manjangkon angka barita nauli nang na pasahathon barita na uli i, na ingkon dapotan tua do ima asi ni roha marhite barita nauli na patubuhon hamubaon ni roha jala pahothon haporseaon.
Di na mandalani minggu minggu passion hita, lumobi ma di minggu passion na parpudi on, anggiat ma nian ganup hita olo paubaon roha. Jala hataridaanna marhite turpuk jamita on, tangkas do tabereng STATUS ndang menentuhon roha ni ganup jolma gabe sijangkon Jesus songon angka malim dohot angka siboto surat i. Alani holan sada do na hinirim ni Debata, di na disarihon Debata ngolunta marhite barita nauli, tajangkon ma i di bagasan las ni roha jala gabe tau tu hamubaon ni roha ma di hita ganup, ai hamubaon ni roha ido na hinirim ni Debata sian hita ganup.
Angka dongan sahaporseaon, marhite naung tolhas jamita sadari on tu hita, di turpuk jamita sadari on sasintongna Jesus sandiri pe nunga be patolhashon tu angka malim dohot siboto surat i, taringot tu hadirionna, ianggo nampuna porlak i sasintongan Debata ma i, jala angka siboto surat dohot malim i sintongna nunga be parsidohot nasida gabe pangula di porlak anggur ni Debata, alai ala so tingkos pangkirmon dohot panandaion nasida di Debata gabe di tulak nasida angka panurirang i, jala sahat tu Jesus Kristus sandiri pe di tulak nasida do bahkan di pamate songon nidok ni umpana nai. Aha do upa ni angka jolma na mangulahon si songoni ? Gabe tu hamagoan do jambar nasida jada magopo ma ngolu nasida di ari parpudi (16).
Marhite umpana on, nunga be di paboa Jesus sasintongna na ingkon pamateon nasida do Jesus i, jala hamatean nai do na gabe tau padomuhon hita tu Debata jala dalan tu hasintonganta. Alani di hita saluhutna, marhite Thema ni jamita di hita di minggu sadari on na mandok “ta jangkon ma asi ni roha na sian Debata”. Anggiat ma tutu di ari sadari on, sude hita manghaporseai jala manjangkon asi ni roha nai, jala mian ma tongtong hita di bagasan holong ni rohana asa sahat hita tu asi ni roha na manongtong.
Amen !..
“Pdt. Ardianus Situmorang S.Th”
Tidak ada komentar:
Posting Komentar