Jamita Patangiangan
Nats : Filipi 3 : 4 – 14
Patujolo : Angka dongan sahaporseaon, molo taida do angka na masa di tonga tonga ni parkeluarga on ta, bangkona do di angka natua tua molo so adong hamubaon ni roha ni angka ianakhonta. Nga talehon rohanta, gogonta dohot sude na adong di hita, alai ndang adong tarida perkembanganna, tontu olo do tarrimas hita jala mambahen godang angka tudos tudos asa anggiat nian lam tarida hamubaon ni roha.
Laos songoni do nang di turpuk jamita sadari on pe, di patudos si Apostel Paulus do dirina maradophon halak Filipi ala sai mulak ulak tu pudi haporseaon nasida, jala di patolhas ibana do taringot tu perbedaan ni parangena andorang so ditanda Jesus dohot dung di tanda Ibana. Sialani i, marhite turpuk jamita di borngin on didok hata ni Debata do tu hita marhite Thema na mandok :
Thema : Taparangehon ma hatigoran na sian Kristus Jesus
1. Unang mulahulak tu pudi be haporseaonta
Angka dongan sahaporseaon, marhite turpuk jamitanta di borngin on, tangkas do di patolhas si Apostel Paulus taringot tu ngoluna andorang so di tanda Jesus Kristus, songoni nang taringot tu angka parangena maradophon siboan barita nauli (6), dohot hasetiaonna mangulahon patik songon halak parise ibana(5). Andorang so di tangkup Debata ibana gabe sahalak siboan barita nauli, di hirim jala di haporseai ibana do sude angka na niula nai gabe tau hadengganan na mangalehon tu ibana surgo manang na haluaon i. Jala nang di hita pe jotjot do masa angka sisongon on, godang dope nuaeng masa angka na mangambati parbaritaon nauli, paporsuk porsukhon ngolu ni angka parbarita nauli, jala di ngolunta on sai torop dope na marpingkiran holan alani gogo na sambing do asa mangolu hita di portibi on. Ido umbahen ndang apala ringkot angka ulaon parsaoran dohot Debata, parmingguon nang angka ulaon partangiangan. Sasintongna angka na lilu do hita maradophon Debata molo sai songoni dope angka parangenta, jala sarupa ma hita tu ngolu ni si apostel Paulus andorang so di Tanda Debata.
Siala ni i, marhite naung di hatindanghon Apostel i taringot masa laluna tu halak Pilipi. Nang di hita pe di borngin on gabe sada singot singot do on di hita asa unang gabe lemba di haporseaon, jala ingkon tubu do sungkun sungkun di bagasan rohanta, hira hira sahat tu dia do nunga nuaeng hataridaan ni perobahan hidup – Pangkorhon ni PERTOBATAN di hita dung ta jangkon Jesus Kristus sipalua i?.
Ia hata ni Debata di borngin on mandok do tu hita :
1. Unang golom ria ria haporseaon i
2. Unang mulak ulak tu pudi haporseaon ta
3. Jala unang gabe umpos an rohanta di portibi on dari pada tu Tuhan Debata.
Marhite turpuk jamita di borngin on, di hatindanghon apostel Paulus do “gabe harugian do inna sude angka na di anggap na hian hauntungan alani Jesus Kristus”. Di ari parpudi on, molo tapaihut ihut do angka na masa, torop do jolma na menghalalka segala cara bohama asa mangomo di arta portibi, jala lam martamba tamba do bilangan ni angka na maninggalhon haporseaon na maradophon Debata “isarana - nunga tabege berita ima piga piga halak artis na baru baru on gabe maninggalhon hakaristenon”.
Jala sasintongna, molo tasadari do di angka na masa nuaeng lumobi ma di hita na SAHURIA, boi dohonon torop dope hita na golom ria ria di na marhaporseaon, ido umbahen bangkol ro mandohoti angka partangiangan, jala songoni nang di angka parmingguan, dohot bangkol laho mangalehon kewajibanna tu huria.
Siala ni i, turpuk jamita di hita di borngin on di paingot do gomos tu hita asa taparangehon ma angka parange naimbaru, ima angka parange hatiuron songon pambahenan ni Jesus Kristus maradophon angka hita Jolma, ima hatigoran na marojahan tu haporseaon (9).
2. Asa sahat hita tu asi ni roha naung pinnarade ni Debata.
Angka dongan sahaporseaon, molo tajaha do di ayat 11 na di dok apostel Paulus do “asa sahat au tu haheheon na sian angka na mate”. Pangkirimon ni ganup jolma na di portibi on naeng do ingkon mangomo nian, ima mangomo di surgo hasonangan i, haheheon ni tondi songon Jesus naung hehe sian hamatean i.
Siala ni aha do na patut ulahononta asa sahat hita di asi ni roha ni Debata ?
1. Ia asi ni roha i ima haluaon naung pinarade ni Debata, silehon lehon ni Debata do i tu hita ganup na porsea marhite naung mate Jesus Kristus di hau pinorsilang, alani do asa di hatindanghon si apostel paulus “ndang alani na mangulahon patik hita asa gabe sintong di adopan ni Debata, jala na marlapatan do i, ndang alani gogonta, ndang alani burjunta, ndang alani pambahenanta, alai holan ala ni asi ni rohaNa do di ganup na porsea tu Debata.
2. Ganup hita, ingkon do mian di bagasan haporseaon na togu na manogu nogu hita mangulahon angka parange na denggan ima angka parange hatiruon na nionjar ni Tondi porbadia. Jala ganup angka naung mian di bagasan hamubaon ni roha, ingkon barani do manadinghon saluhut angka na mangambati hita jonok tu Debata. Di ayat 14 di dok apostel i do “hu halupahon na di pudingku jala hueaki angka na di jolo, ima mangulahon lomo ni roha ni Debata.
Sialai i, nunga be tutu sahat tu hita asi ni roha ni Debata, jala nunga be tarpillit jala tarjou hita na gabe partohap di asi ni rohaNa marhite Pandidion na badia i, na patupahon haseaan ni dosanta jala padomuhon hita dohot Debata, laos di pahot do muse haporseaon ta i marhite hataNa naung ta jalo jala ta jaha di siganup tingki, nang di mudar dohot dagingNa na tajaloi marhite ulaon na badia. Anggiat ma nian tu joloan on ingkon pos do rohanta di asi ni roha ni Debata, jala unang be mansohot hita marhaporseaon, unang mulahulak tu pudi be haporseaonta.
Sai tongtong ma talehon rohanta, tingkinta nang pingkiranta di togu togu tondi porbadia i asa di pargogoi hita marhaposan tu Debata lumobi ma mangulahon angka parange na denggan di nasa ngolunta ganup. Amen !.
Tidak ada komentar:
Posting Komentar