BAHAN KHOTBAH MINGGU PALMARUM
Minggu : Palmarum “mare mare/Daun Palem” mengenang penyambutan Yesus Kristus memasuki Yerusalem di sambut oleh orang banyak. Minggu Palmarum adalah minggu sebelum paskah dalam kalender Gerejawi.
Evangelium : Matius 21 : 1 - 11
Pendahuluan : Di minggu parjolo laho marsitaonon Jesus Kristus i mamasuhi luat Jerusalem, tangkas do di pataridahon Ibana hadirionna tu angka siseannai, ima di namardalan nasida mamasuhi luat Jerusalem, dung sahat nasida di huta Betpage donokhon luat Jerusalem di suru Ibana ma dua halak sian siseannai laho mangalap Halode laho pangkeonna mamasuhi luat Jerusalem. Sasintongna hurang do dengganna di portibi on molo sahalak raja ro mandapothon sada luat naik halode. Alai dison di naeng patar antusonna dia do tujuan haroro ni Jesus Kristus i tu portibi on, Alani marhite turpuk on godang naeng dohonon ni Jamita on tu hita, ima na mandok :
Thema : JANGKON MA JESUS NAUNG RO TU PORTIBI ON
1. Songon dia do na manjangkon Jesus i ?
Di tingki laho mamasuhi minggu Paskah ima parningotan di bangso Israel “perayaan pembebasan dari perbudakan tanah mesir”, jumpang ma tingkina na ingkon marsitaonon na porsuk Jesus i di huta Jerusalem. Di pardalanan nai lao masuk tu luat Jerusalem, sai tongtong do di papatar Jesus tujuan haroro nai tu portibi on. Molo pe portibion manghirim, Raja na naing ro i ikkon sangap di ida mata (Raja pakai Kuda jala marpangkean na megah) alai saluhutnai berbeda do taringot tu haroro ni Jesus tu portibi on lumobi ma laho mamasuhi luat Jerusalem. Halode do di hunduli Jesus i ima naeng pahothon naung sinuriranghon ni Nabi Sakaria (Sak. 9:9,Mat 21 :4), na mandok Raja na naeng ro i ikkon do marsihundul di atas ni halode. Ia molo di kalangan ni halak Jahudi sahalak raja ndang pantas naik halode alai ikkon naek Hoda do. Jesus naik halode ro tu Jerusalem sasintongna lao papatarhon jala patuduhon halambohon ni roha ni Jesus tu pangisi ni luat Jerusalem jala ndang na aning lao marporang songon angka raja na manghunduli angka Hoda. Alai sian i di patarida Ibana do haserepon ni roha nang lambok ni rohana (Mat. 21:25). Jala nang pe songoni haroro ni Jesus tu jerusalem torop do angka naso marlomo niroha lumobi ma sian tonga tonga ni halak (Joh.12:19).
Di tingki haroro ni Jesus laho mamasuhi luat Jerusalem, torop do jolma na marlas ni roha ala naung sar tarbarita taringot tu haroro ni Jesus (Joh. 12 :13) di pambuati angka jolma na torop i ma angka mare mare laho manomu haroro ni Jesus i, jala torop do nasida di tingki i na pahembanghon angka ulos na be di dalan ni halodei laho manomu Jesus (Mat. 21 : 8). Sasintongna sada angka pambahenan na uli jala na ni onjar ni angka las ni roha do saluhutna i. Alai ingkon do antusanta marhite namasa dison do tardapot angka jolma i, molo sala do panandaion laos sala ma nang dohot pangkirimon. Boi do i tabereng, ndang apa gok dope saminggu manipat nunga marbalik roha ni angka jolma na mambahen angka mare mare nang na pahembanghon angka ulos nasida i taringot tu Jesus, lupa do nasida di panomu nomuon nai laos dohot do nasida mandok Parsilanghon Ibana (Mat. 27 : 23,25). Artina di hita saluhutna, nuaeng tangkas do ta antusi ia Jesus Kristus i mate jala hehe sian hamatean i, saluhutna i holan laho manggarar utang ni dosanta do di patupa Ibana. Alani ido umbahen ndang patut hita jolma marpos ni roha holan satongkin tu Debata (mohop satongkin) gabe gara do i jala ndang tama di Debata angka parhaporseaon sisongoni.
Di panomu nomuon ni angka natorop di haroro ni Jesus tingki i, sasintongna ndang apala na nionjar ni panandaion na sintong taringot tu Jesus, asa di tomu nasida alai ala na binege nasida do naung pinamasa ni Jesus tu si Lazarus dipahehe sian na mate (Joh 12 : 17-18) ido umbahen asa torop ro manomu Jesus i. Toho do i, sude do hita butuh pangurupion, panogu noguon, alai anggo sala do panghirimonta taringot tu Jesus, umpamana songon angka jola na mangalului hasehaton sambung sian Jesus, Marhita barita ala boi jesus pamalumhon, manang na gabe tapaksa pajonokhon diri hita tu Debata asa lam tarpasu pasu, asa sehat dung dapot sude i gabe mandao hita “itu adalah suatu motivasi yang keliru” jala molo tung pe so dapot angka na tahirim i, molo alani angka si humisik do manang na alani tingkat ni angka pardagingon sambung do asa ro hita manjonokhon diri tu Debata tongtong do angka motivasi na salah i (panghirimon naso tingkos) . Alai naeng dohonon motivasi manang panandaion na Sintong taringot tu Jesus ima napajonokhon jala paserep roha di adopan ni Debata ala naung “di padame Jesus Kristus hita tu Debata” parjambar di harajaon nai marhite hamamate ni Kristus Jesus i humongkop dosanta (Efesus. 1:7-8).
Alani songon dia do hape hita manjangkon Jesus i ?.
Ia di huria Luheran di hatindanghon do “naso tarbahen au porsea ianggo so marhite panogu noguon ni tondi porbadia”. Artina martudosan tu sungkun sungkun i, asa tingkos hita manjangkon Kristus Jesus i, ingkon do tingkos panandaion ta taringot tu Jesus Kristus. ia Jesus Kristus ro tu portibi on holan laho paluahon hita jolma sian gonggoman ni dosa, ima marhite naung mate Jesus di hau pinarsilang, “Tanpa kematian Kristus tidak ada orang yang tertebus dari dosa”. Holan marhite panoguon ni tondi porbadia do hita manghatindanghon jala manghaporseai i. Molo hot do pangantusionta taringot tusi, togu toguon ni tondi porbadiai do hita laho mananggalhon saluhut angka nauli na denggan menurut ni portibi on naso hinalomohon ni roha ni Debata, isarana songon jolma natorop i di paherbang angka ulosna lao manomu Kristus i, laos baliksa songoni ma naeng nian hita ikkon rade paherbanghon rohanta nang mangalehon tingkitta lao manomu/manjanghon Kristus naung mangalehon hangoluan i di hita. Ia molo naung maringan Kristus i di hita ganup pasti berbeda ma hita sian angka pamujian ni na torop i (Mat. 21:9) na marlapatan ndang holan mandok di bibir be, alai mamuji jala mamelehon dirinta on gabe pelean nauli na denggan jala tau hasangapon di goar ni Debata.
Marningot di minggu palmarum di tingki on, sisintongna dison ma ta ingot ima minggu na terakhir di Jesus Kristus di Jerusalem laho marsitaonon di hau pinarsilang. Jala doshon tusido minggu Palmarum on didok ma i minggu sengsara Kristus na marlapatan paingothon jala ingkon do manghilala hita songon dia Kristus Jesus i marsitaonon holan humongkop hita ganup angka na pardosa na porsea di Ibana.
2. Asa dapot haluaon na saleleng ni lelengna hita
Sude do jolma manghirim di hangoluon Sogot, , alai songon dia do panghirimon taringot tu hangoluan na saleleng ni leleng nai ?.
Laho manjalo hangoluan na saleleng ni leleng nai holan sada do dalan ima marhite Jesus Kristus, molo pe di dok angka na asing beribu ribu jalan ke roma beribu ribu agama menuju surga nang songoni pandohan Surga ada di bawah telapak kaki ibu “itu adalah suatu kesesatan”. Holan Jesus do dalan hangoluan si saleleng ni lelengna (Yoh. 14:6).
Barita ni Jesus na mamasuhi Jerusalem, sasintongna sada lasni roha bolon do on di torop angka jolma naung hea mamereng angka na pinamasa ni Jesus Kristus. Lumobi ma di tingki i naeng mamasuhi pesta perayaan paskah (Hari raya roti tidak beragi) manang na hari pembebasan di halak Israel sian perbudakan di tano mesir. Marhite turpuk on naeng ido papataron ni Jesus Kristus i, asa patar do Jesus i ro tu portibi on HOLAN lao paluahon hita jolma sian perbudakan ni dosa. Sian bortian pe hita nunga mardosa (Maz. 51 : 7) jala butuh penyelamatan sian gonggoman ni dosa. Molo di zaman ni bangso Israel roti tidak beragi do di patupa nasida, alai anggo nuaeng Mudar dohot daging ni Kristus Jesus ido gabe pelean na badia jala na tau ingkon panganonta (Parpadanan na badia) laho mangalehon tu hita hasesaan ni dosa. Alani di hita saluhuhtna sada las ni roha do on, barita taringot tu hamonangan ni Jesus manaluhon dosa i. Patar ma naung gabe bebas hita marhite hamonangan na pinatupa ni Jesus Kristus i. Debata do nampuna hita nuaeng jala na manghonghop hita ganup angka na porsea di Ibana.
Sada na ringkot na ingkon hangoluhonon ni hita halak Kristen di portibi on ima “Manghamuliatehon Hamamate ni Kristus Jesus”. molo di dok manghamuliatehon hamamate ni Kristus Jesus ima na tutu manghangoluhon jala marpos ni roha di Tuhan i sambing. Saluhut do hita angka na marponi roha dapot hangoluan sisaleleng ni lelengna. Jala di onjar pos ni roha ido hita lao mangulahon angka na denggan. Lumobi ma managam haroro ni Jeus na paduahalihon.
Alani marhite pandohan ni thema jamita on “Jangkon ma Jesus naung ro tu portibi on” ingkon do berbeda siang angka natorop i hita, unang marhaporseaon satongkin songon angka bangso namanomu Jesus i. Alai naeng nian ingkon manongtong do hita marpos ni roha, lumobi ma tahe rade manghatindanghon Kristus Jesus sipalua i songon na nidok na “Hosianna di anak ni Raja Daud, pinasu pasu ma na ro marhite goar ni Tuhan i, hosianna ma di Ginjang” ai ido ngolu ni angka partigor, tama tapuji jala tapasangap goar ni Debata marhite haluaon naung pinaradenai. Amen.
Sinurathon ni Pdt. Ardinaus Situmorang S.Th
Tidak ada komentar:
Posting Komentar