Minggu, 08 Desember 2024
MINGGU
ADVENT II
Panomunomuon diharoro ni Tuhan Jesus
EVANGELIUM
: LUKAS 3 : 1 – 20
Patujolo
:
Sadarion
masuk ma hita tu minggu Adven na pa II hon, ima ari panomunomuon di Tuhanta Jesus
Kristus. Marhite turpuk jamita di ari sadari on, di pangkobasion ni si Johannes
pandidi namamaritahon barita taringot tu hamubaon ni roha, mansai borat do
sitaonon na niadopanna alani ulaon partondian i, jala hinorhon ni parbaritaon
nai do gabe mago hosana alani barani manghatindanghon na sintong maradophon
angka panggomgomi uju i. Marhite turpuk jamita sadari on sasintongna molo bagas
do hita marningot, sian padan na robi nunga be sai marulak ulak di baritahon
barita taringot tu hamubaon ni roha (Pertobatan) alai sahat tu tingki on, torop
dope naso tulus paubahon roha di adopan ni Debata, godang dope angka
parhaporseaon na golom ria ria. Alani marhite Jamita di minggu Adven na pa II
hon sadari on, di sungguli Debata do hita marhite thema ni jamita na mandok
“Manongtong
ma hita di bagasan hamubaon ni Roha”
THEMA
: MANONGTONG MA HITA DI BAGASAN HAMUBAON NI ROHA
1.
AHA
DO HAMUBAON NI ROHA I ?
Na
parjolo tapuji ma Tuhan Debata ala naung sahat do hita nuaeng ima tu taon baru
parhuriaon di ari sadari on, molo dung masuk tu minggu Adven di goari ma on Taon Baru Ni Huria tontu ingkon do
tasadari bahwa sehat pe hita sahat tu tingki on ndang alani gogo ta i, alai ala
ni denggan basa ni Debata do i na tongtong parorothon hita di siganup tingki. Adven marharoroan ma i sian hata latin
ima Adventus na marlapatan ma i haroro ni Jesus Kristus tu portibi on jala
minggu minggu Adven on di pamasa ma on andorang so sahat tu pesta Natal. Marhite
minggu Adven na pa II hon on di paingot ma hita di angka na pinamasa ni Debata
dohot na naeng pamasa on Na, di na parjolo ima haroro ni Jesus Kristus tu portibion sorang gabe sahalak jolma marhite
si Maria, jala mate laos hehe sian hamatean i pamonanghon hita ganup angka na jolma
pardosa, di partingkianta nuaeng on di paingot do tongtong tu hita ima di na
manomu nomu di haroro ni Jesus Kristus di ari parpudi, na ingkon ro do Jesus Kristus
i padua halihon tu portibi on marhite huasona laho pasahathon tumpal hangoluan
tu ganup angka na porsea, jala mangalehon uhum tu angka parjahat(Mat.16:27-28;Lukas 3:9).
Hombar tu saluhut nai, di turpuk jamita
sadari on jongjong do si Johannes pandidi ima na tinubuhon ni si Elisabet na ni
alap ni si Sakaria, di totophon Debata do bahwa si Johannes pandidi ima na gabe
patujolo ni Debata laho pature dalan di Tuhan i, mandidi Jesus Kristus di aek
Jordan, jala mamaritahon hamubaon ni roha di angka jolma pardosa/keturunan Iblis(Mat.13:34;Lukas 3:7). Jala tujuan utama
haroro ni si Johannes pandidi ima patulushon sangkap di Debata manang na misi
ni Debata laho paradehon dalan di haroro ni Jesus Kristus(Jes.40:3-5), paingothon saluhut angka jolma asa sude paradehon
diri marhite hamubaon ni roha, mangolu di bagasan hamubaon ni roha(Luk. 3:8). Di pangkobasion ni si Johannes pandidi
sintong do ibana mangulahon ulaon na i, alai baliksa do na masa tu ibana, tung
pe angka hasintongan i do di baritahon ibana, alai gabe sogo do roha ni si Herodias
alani na di paingot ibana bahwa dang sintong ibana marroha roha tu raja
Herodes. Molo tapatudos do tu namasa nuaeng, jotjot do gabe masa angka
perselisihan, bahkan paraccitan ni roha di angka pardonganon ala na barani hita
manghatindangkon hasintongan, alai dison ma ingkon do ta tantusi bahwa parbue
ni hamubaon ni roha ingkon do barani manghatindangkon angka na sintong i,
ingkon do adong hataridaan na sian hita namarpos ni roha di Debata, na olo
pauahon roha ingkon do marparbue di ngoluna siganup ari(Luk.3:8). Ingkon do olo marbagi tu angka na
hurangan(Gal.6:2;Luk.3:13;Matius 22:39). Jala marhite turpuk on
di paingot do hita bahwa di angka hita naso olo paubahon roha na gabe ambolong
do muse tu api narokko i(Mat.7:19;Luk.3:9).
2.
ASA
SAHAT HITA TU TUMPAL HANGOLUAN I
Ia tumpal hangoluan i, ima Surgo hasongan
i, jala holan marhite Jesus Kristus do asa sahat hita tusi.
Alani marhite goar
ni mingguta sadari on di goari ma minggu Adven na pa duahon. Di tingki on pe, sai
jot-jot do molo naung masuk tu taon baru parhurian (Adven) hampir sude do nasa
na targoar Karisten di portibi on serba sibuk laho paradehon angka na hombar tu
pesta Natal, lumobi ma di tonga tonga ni Huria adong ma na paradehon angka gaba
gaba (Pernak pernik Natal), pembentukan panitia Natal, Latihan latihan Natal, nang
lan angka na asing. Sasintongna angka na denggan jala na uli situtu do na
taulahon i, alai ia di Debata ndang adong marguna saluhutna i molo rohanta on
ndang taparade manomu haroro Nai, ingkhon do songon tema ni jamitanta sadari on
na mandok “Tongtong Ma Hita Dibagasan Hamubaon
Ni Roha”. Na hinirim ni Jesus Kristus sian hita jala na mansai ringkot ingkon
do jumolo hita paradehon roha laho manjangkon Jesus Kristus, ima marhite hamubaon
ni roha (Pertobatan). Ia hamubaon ni roha i sasintongna ulaon ni Tondi Porbadia
doi, jala ndang tarulahon hita paubahon roha ianggo so mian tondi ni Debata di
rohanta na tongtong manogar-nogari rohanta ganup. Songon na didok di Konfessi
Augsburg artikel XII taringot tu hamubaon ni roha“na adong do hasesaan ni dosa di angka halak na madabu tu bagasan dosa
dung tardidi, jala na olo di pauba tondi porbadia i rohana siganup ari, jala
isi ni hamubaon ni roha holan dua do, ima Panolsolion di angka dosa, dohot
haporseaon na polin na tinubuhon ni barita nauli”. Ai sian hamubaon ni roha
ido, jumpangta ma hasesaan ni dosa molo sai tongtong martoruk ni roha hita
manolsoli angka dosanta di adopan ni Debata, jala marhite sian hasesaan ni Dosa
ido dapotta ma hasonangan ni tondi ta ima Surgo hasonangan i (sebab di dalam pengampunan dosa ada keselamatan).
Taringot tu ulaon ni Huria, molo mamereng
do hita secara teliti taringot tu angka aturan dohot ulaon ni Huria isarana
pesta Natal. Molo antus do taparsiajari sasintongna ndang tingkos manang na
ndang tepat dope molo di patupa di tonga tonga ni Huria angka pesta Natal di bagasan
minggu minggu Adven, lumobi ma di masa minggu ta saonari. Alani i, ringkot do
ingkon ihuthonon kalender tahun liturgi Gerejawi i di bagasan pardalananna na
sintong jala hinorhon ni i singkop ma ta antusi aha do minggu Adven laos
marhite ido gabe polin ma makna ni Natal i dihita lumobi ma di huria GKLI na
manghajongjongon huria na liturgis (Lutheran). Isarana, sada hal na hurang
marondolan do molo di patupa pesta Paskah di minggu Palmarum, manang na
tapatupa perayaan minggu Adven di minggu trinitatis, songoni ma sasintongna
nian, ala di bagasan minggu panomu nomuan dope hita ndang tingkos dope nian
molo intor gabe pajolo hu hita di huria i patupahon Natal di minggu paanomu nomuon sesui urutan di
Kalender Gerejawi ni Huria i.
Alani asa bagas
pangarimang-rimangionta jala bagas pangantusion ta di minggu Adven on, sude ma
nian hita paturehon roha, paholanghon diri sian angka naso ture laho mamasuhi
minggu Natal na badia i. Alana molo tabereng di angka namasa di tahun naung
salpu laos di pesta natal na naeng ro on, dung sahat hita tu minggu Natal
manang na malam Natal torop nama hita naso bergairah, bahkan godang nama manalpuhon
tingki nauli i songon angka ari na biasa (dang
ingot be hita songon dia Jesus Kristus i lahir di inganan na bernit, songon
parsonggop ni Tondi porbadia di rohanta na so tingkos). Na ingkhon masa ma
sisongoni ala naung loja hita mangihuthon saluhut angka pesta Natal di angka
punguan, adong ma deba naung loja paradehon angka Natal na di patupa di minggu
Adven, jala torop do na gabe so mar-Natal pas di mata ni pesta Natal i, alani paraccitan
ni roha manang na parbada bada on holan alani angka persiapan Natal. Alani, di minggu
minggu adven on ganjang do sasintongna pola do sampe 4 hali hita mar Adven, na
marlapatan ma i asa jumolo ma ganjang jala bagas ma rohanta tapaias, tapauba ma
rohanta ganup marhite panoguon ni Tondi porbada i, asa maria ia situtu hita
marningot di pesta hatutubu ni Jesus Kristus i, lumobi ma naung mian jala
jongjong mangarajai Tondi Porbadia i di rohanta ganup(ngolu na imbaru).
Alani
marhite turpuk on, nunga tung tangkas be barita manang na sejarah taringot tu
hasosorang ni Jesus Kristus tu portibi on, sintong do i songon na didok di ayat
1 dohot 2 singkop do di patorang si Lukkas ro di angka sejarah ni hatutubu ni
Jesus i di masa ni panggomgomi di tingki i, ro di si Johannes pandidi na
mandidihon Jesus Kristus. Jadi, unang adong be hita na mangaraguhon taringot tu
Jesus Kristus sipalua i. Marhite turpuk jamita sadari on, na porlu jala na
paling utama si paradeon ta ima hamubaon ni roha, ima mamelehon diri tu Debata
marhite angka parniluaonta. Sapala naung jongjong Jesus Kristus i, Tondi Porbadia
i mangarajai di rohanta ganup, talehon ma roha na marpangoloion, jala sude ma
hita hobas laho mangulahon angka na denggan, marsiurupan jala marsilehonan
dame. Molo pe di tingki on tabereng godang dope angka naso perduli taringot tu
angka dosana, manang na ndang apala di haringkothon be di manolsoli dosa di
adopan ni Debata. Ianggo hita nian, ingkon do tontong mangolu di bagasan
hamubaon ni Roha, ai ido ngolu ni angka na mananda Kristus Jesus i, jala
hamubaon ni roha ido tanda naung mian Debata di hita, na mambahen jala
pataruhon hita sahat tu asi ni roha ni Debata, ima surgo naung pinarade ni
Debata di hita.
Asi ni roha dohot dame ni Debata Ama, Anak
dohot Tondi Porbadia ma na tongtong manogu nogu hita saluhutna. Amen!
Na sinurathon ni :
Pdt.
Ardianus Situmorang S.Th
Pandita GKLI Resort Baloi Kolam Batam
Tidak ada komentar:
Posting Komentar