Heber 9 : 11 – 22 Pos ma rohamu Mudar ni Kristus do Patupahon Hasesaan ni dosanta

 

JAMITA PARTANGIANGAN

Nats   : Heber 9 : 11 – 22

Tema : Pos ma rohamu Mudar ni Kristus do Patupahon Hasesaan ni dosanta

Patujolo :  Molo marningot hita di namasa di padan na robi, sada aturan na ni aturhon ni Debata do di ganup angka jolma pardosa na ingkon do pasahaton pelean naummuli jala naundenggan, ai tangkas do tajaha nakin di pasahat si Musa do mudar ni anak ni lombu dohot hambing randuk mardongan aek, hapas na rara dohot limut isop(19) jala dung di patupa i, gabe mangkhorhon haiason di sibuk do i(13). Marhite angka na masa i boi do antusanta bahwa Mudar ni Jesus Kristus andul do umbadia mudar na pinasahatnai tu hamatean gabe tau pelean na ummuli maradophon Debata asa tarjalo hita hasesaan ni dosanta. Alani, marhite turpuk jamita partangianganta di borngin on di podahon hata ni Debata do tu hita :

Tema : Pos ma rohamu Mudar ni Kristus ido na patupahon hasesaan ni dosanta.

1.   Ndang alani peleanta manang alani gogonta asa sesa dosanta

Sian padan na robi nunga di surirangkon angka panurirang na parjolo bahwa na ingkon ro do Jesus Kristus anak ni Debata tu portibi on(Yeremia 23:5-6) laho sumeahon hosana humongkop hita jolma pardosa. Marhite hata on boi do antusanta, jala ingkon do haporseaonta bahwa di luar ni sude angka pelean na tapasahat tu Debata, baik akka korban Syukuran songon na pinatupa ni si Musa, dohot angka pelan situtungon ndang boi i na gabe pahothon manang na padomuhon hita muse mulak tu Debata ianggo so marhite hite mudar ni Kristus Jesus i. Jala di turpuk jamita di borngin on tangkas do di parboa si Apostel Paulus tu huria Ibrani molo pe na jolo di patupa si Musa napasahathon angka pelean na uli jala na denggan marhite mudar ni hambing randuk dohot anak ni lombu holan tau patupahon haiason ni sibuk sambing do i manang na disucikan secara lahiriah songon na nidok na di ayat 13.

Di naung ro Jesus Kristus tu portibi on gabe hot do asi ni roha i di patupa di hita, di pelehon do mudarna na badia i, asa dapot hita haiason di bagasan roha jala ido sasintongna na patauhon hita laho ro mandapothon Debata(14). Jesus ido na manggonophon padan na robi i, jala Jesus Kristus ido na gabe sintua ni malim na rajani di hita saluhut angka na porsea, alani marhite pandohan on, nda lam ingkon sumerep ma nian rohanta maradophon Debata?. Nda ingkon lam patar ma nian holong ni roha di ngolunta siganup tingki ?.

Di jamitanta di minggu XXIII dung Trinitatis di dok hata ni Debata do tu hita asa taulahon Patik Raja i “tahaholongi ma Debata sian nasa Rohanta, Pingkiran nang gogonta, jala tahahologi ma donganta jolma songon manghaholongi dirinta sandiri(Mark 12:30-31). On do sasintongna na ingkon ulahonon ni ganup angka na porsea, ai lobi dumenggan do jala ummangat do molo jumolo hita marsihaholongan sama hita di portibi on daripada na tapasahat peleanta tu Debata alai sama hita ndang mardame(1 Samuel 15:22;Mark 12:33).

Adong do hata ni Dr. Martin Luther na mandok “dibalik pengampunan dosa ada Keselamatan” sintong do pandohan on, jala marojahan tu hata ni Debata do hata on. Ai tangkas ma ta antusi, ia pengampunan i na pinatupa ni Debata do tu hita i, jala ganup na manjalo hasesaan ni dosa angka ido na sipangomo di asi ni roha i. Hombar tu pandohan ni hata ni Debata na patut ingkon ambolong hian do hita tu api narokko i alani dosanta(Rom 6:23a), alai dison ma patar ingkon antusanta jala ingkon haporseaonta do bahwa ala naso boi do hita jolma on paluahon dirinta sian dosa hamatean i. Ndang boi artanta pataruhon hita tu surgo hasonganan i, tangkas do taantusi jala tabereng bahwa di ganup angka naung masa di angka na parjolo marujung ndang boi arta nasida i mangambati ajal hamatean, jala ndang boi arta i boanonta, cukup do holan baju na salampis i, tudos ma i songon na nidok ni si Job(Job 1:21). Na lao salpu do ianggo portibi on, jala sude do hita na ingkon lao sian portibi on.

Alani dia do na patut ingkon ulahononta di ngolunta siganup ari ??

2.   Alani sude ma hita manghamuliatehon asi ni roha i

Hombar tu pangajarion ni huria Lutheran marhite hata ni Debata di ajarhon do tu hita bahwa Jesus Kristus i Sintong do i anak ni Dabata, Jala Jesus Kristus ido sasintongna na na gabe Malim na Rajani di ganup angka na porsea(11). Adong 3 jabatan ni Jesus Kristus i, ima na Gabe Raja, Malim, dohot Nabi. Nunga di pasingkop Jesus i be saluhutna i, jala nunga patar be di pahot Ibana Padan na robi i, marhite hamamate ni Jesus Kristus(17). Hamatean ido na patauhon hita manjalo di asi ni roha, mangomo di surgo hasonangan i . Mudar ni Kristus Jesus ido na manggarar lunas utang ni dosanta. Jala Jesus Kristus i sandiri do na padamehon jala pasadahon hita mulak muse tu holong ni roha ni Debata(Joh3:16;15:4). Alani di si ganup tingki ingkon do nian hita marningot di asi ni roha i, jala ingkon do tarida nian bahwa na toho hita manghamuliatehon hamamate ni Jesus Kristus na gabe tau pelean na sun badia na padamehon hita dohot Debata.

Marhite ulaon na pinatupa ni si musa di padan na robi, songon dia nama hita pasahathon peleanta tu Debata?.

Ianggo di Debata sasintongna ndang apala unringkot songon angka pelean na tapasahat tu huria i, ima angka sinamot dohot lan angka na asing ai tangkas do ta antusi sian Debata do saluhutna i. Alani porlu do jumolo tatangkasi rohanta ganup. Molo pe pasahathon pelean hita tu Debata ingkon ma nian gabe tau tu hasangapon ni Debata. Ai jotjot dope hita tardapot marpangkirimon molo talehon peleanta godang asa lam gumodang ma di lehon pasu pasu, sipata olo gabe songon na manogok Debata marhite huria molo sala pangkirimon “pasahathon pelean asa lam martamba tamba pasu pasu” boi do gabe sala duga jala sala tafsir angka na pahothon logika. Seolah olah na tasogok ma Debata asa lam di lehon marbunga angka pelean ta i. Berbeda do ketulusan ni roha ni angka na pashathon pelean ala naung menyadari di asi ni roha ni Debata dari pada pasahathon asa lam di lehon gumodang.

Marhite turpuk jamita on di dok hata ni Debata do marhite na surat ni si Apostel paulus tu huria Roma 12:1, asa ingkon do ngolunta on hape na gabe tau pelean na ummuli jala na undenggan tu Debata. Ganup angka na manghaholongi Debata sian nasa roha, pingkiran dohot gogo angka ido na mian di bagasan holong ni Debata, ulaon ni tondi do holong ni roha i, jala ulaon ni tondi do mangonjar roha ni ganup angka jolma laho manghamuliatehon di denggan basa ni Debata. Lumobi ma pashathon pelean maradophon Debata, alani di na tapasahat peleanta siganup parmingguan, partangiangan dohot lan angka ulaon na asing, dalanta mandok mauliate ma sasintong na i ala naung di pasu pasu Debata ngolunta siganup tingki. Jala angka na marpangkirimon sisongon on, angka ido na olo pasahathon tu Debata marhite huriana di bagasan tulus ni roha.

Saleleng di lehon Debata dope hosa hangoluan tu hita. Sude ma hita mangingot gomos nunga di pelehon Debata be dirina marhite Jesus Kristus gabe pelean na badia laho papatarhon holong ni roha_Na tu hita ganup angka jolma. Alani i sude ma hita manghamuliatehon i marhite holong ni rohanta naso boi hita mandao sian Debata, na tongotng manghajugulhon martangiang, tapajonok ma dirinta tu angka parsaoran maradophon Debata, tapelehon ma angka na denggan maradophon Debata marhite huria i, jala lam marsihaholongan ma hita saluhutna, asa tanda hita naung gabe sada, angka na pinadomu ni mudar ni Kristus Jesus i partohap di asi ni roha ima surgo hasonangan i.

Amen !

Pdt. Ardianus Situmorang

GKLI Resort Baloi Kolam