Jamita partangiangan Ibrani 3 : 12 - 19

 

Jamita Partangiangan

 Nats : Ibrani/Heber 3 : 12 – 19

Patujulo : Molo mamereng do hita na masa di saonari on, nunga tung marragam be godang ni angka pangajari jala nunga be lam torop angka na manundalhon/maninggalhon Jesus Kristus. Torop do nuaeng na manghatindangkon naso tingkos taringot tu Jesus Kristus, bahkan sian angka kalangan ni angka halak karisten hian pe nunga be lam torop na maninggalhon hakaristenon i. Di sude angka na masa nuaeng nunga sian mulana torop angka naso olo manghaporseai Jesus. Lumobi ma di perkembangan Zaman nuaeng on, godang do masa maninggalhon hakaristenon i holan asa mangomo di angka arta portibi, jala nang songoni alani angka sitaonon pe nunga be godang na mansoadahon Kristus Jesus i. Di turpuk jamitanta di borngin on di paingot si Paulus do sude angka naporsea na tinggal di huta Ibrani asa unang muba-uba roha nasida jala unang manundalhon Jesus Kristus sipalua hajolmaon i. Siala ni i, nang tu hita pe ido na naeng dohonon ni Jamita on asa molo pe tung porsuk sitaononta di portibi on naeng ma nian tongtong hot haporseaonta,  alani di paingot ma hita marhite tema ni jamita on na mandok :

Tema  : Tongtong Ma Hita Togu Di Haporsean

1.     Unang mose haporseaon jala unang tatundalhon Kristus Jesus i.

Angka dongan sahaporseaon molo tapaihut ihut do angka na masa di portibi on, sasintongna lam matua portibi on lam tu jahat na do nang angka jolma naso mananda Kristus Jesus i, jala godang do angka na porsea i mose di haporseaon jala maninggalhon hakaristenon ala ni angka namasa di portibi on. Isarana, alani angka sitaonon na dokdok, alani angka hasonangan portibi, asa mangomo di arta na godang, jala alani angka pardongan saripeon pe jotjot do masa di angka naung mananda jala mandai di denggan basa ni Debata hian gabe manundalhon jala maninggalhon Jesus Kristus.

 

Di turpuk jamita on, gomos do di paingot apostel i, asa sude nian angka naung mananda Jesus Kristus i gomos maniop sahat ro tu ujung ni hasiangan on ima Jesus Kristus. Nunga tung mansai balga denggan basa ni Debata tu hita ganup angka jolma, pola do Jesus Kristus i marsitaonon holan humongkop hita jolma pardosa on, alai molo so tahamuliatehon do asi ni roha i marhite na hot hita marhaporseaon laos songoni do gabe mago hita jala bolong tu api narokko i, jala di turpuk jamita on pe gomos do didok molo so tapeop do hata ni Debata jala dang tahangoluhon hita ma nanidokna angka sitangkang roha jala angka jolma naso porsea di Jesus i, tangkas ma didok di ayat 15 “sadari on, di na binegemuna soaraNa, unang ma papir hamu rohamuna, songon nasida na tangkang roha i” ganup angka naso olo tangi di soara ni Debata na lao mago do i jala bolong tu api narokko i. Dang adong hita na olo gabe tu api na rokko, jala Debata sandiri pe dang di halomohon hita mago jala bolong tu api narokko i, alani holong ni Debata ido asa pola ro Jesus Kristus holan humongkop hita “Joh. 3:16” siala ni i naeng nian ingkon do tongtong hita togu di bagasan haporseaon. Songon dia do asa togu di haporseaon?.

Di angka padan naimbaru, tung mansai jotjot do di gambarhon Jesus Haporseaon i songon hau Anggur, Jesus do Hau anggur i jala hita on ma angka rantingna, na marlapatan do on sasintongna, songon dia ranting i sada dohot batang i, ingkon do songoni nang hita na sada dohot Jesus Kristus i. Jala ndang hea dope masa boi ranting mangolu ianggo so lokkot tu batang na, nang hita pe sasintongna songoni do na marhaporseaon on, ingkon do sada hita dohot Jesus Kristus i, na marlapatan ma i naeng nian siganup tingki hita ingkon terhubung tu Debata marhite angka tangiang dohot di angka panjahaion marhite hata ni Debata.

 

Molo ta paihut ihut do namasa di turpuk jamita on, masa pe angka sitonon tu bangso Israel alani tangkang ni roha nasida do maradophon Debata(16). Alai nang pe tangkang roha ni bangso i, ianggo asi ni roha ni Debata maradophon bangso tung mansai balga do. Jala sai tongtong do di togu togu pardalanan ni bangso i nang pe sai marungut ungut nasida, di namasa haleon nasida di lehon Debata do roti manna, jala ni pardalanan nasida namasa kekeringan di lehon Debata do aek. Sada gambaran do on saisintongna bahwa songoni do nang pardalanan ni ngolunta, jotjot do hita lupa tu Debata bahkan olo do hita sai mandao sian Debata alai sai tongtong do di lehon Debata tu hita hosa hangoluan jala sai maima ima do Debata di hamumulak ni rohanta. Alani di hita saluhutna, unang be muba uba rohanta manghaporseai Debata, tatiop ma gomos haporseaon i, jala tahangoluhon ma angka parbue ni haporseaon i. Alani i molo pe tung masa angka sitaonon manang na parungkilon na dok-dok di hita sotung gabe mandele hita jala marungut ungut tu Debata. Taingot ma sada na mambahen bangso israel dang bongot tu tano perjanjian i alani tangkang ni roha nasida do nasai tongtong marungut ungut tu Debata (19), nang hita pe songoni do molo ro angka sitaonon tongtong ma togu jala gomos hita marhaporseaon, ai marragam do dalan ni Debata, jala sipata angka sitaonon ipe olo do di pangke Debata laho parhitean ni Debata manambai pasu pasu jala patudu dalan di hita asal ma pos rohanta.

 

2.     Asa gabe partohap hita di surgo hasonangan i di ari parpudi.

Marhite turpuk jamita on, hot ma haporseaon ta jala sude ma hita mameop gomos hata ni Debata, di ayat 12 didok do asa tamatahon (taparohahon/taparateatehon) hata ni Debata, unang be muba uba rohanta maradophon Debata, unang dangol dangol sisilon, alai tongtong ma hot haporseaon ta i. Jala sotung gabe tatundali Debata alani angka namasa di ngolunta, Tung mansai jorbut do roha ni Debata mamereng angka na tangkang roha jala namanundalhon Debata, ido asa didok di turpuk on bahwa hamatean sisaleleng ni leleng na do upa ni angka na manundalhon Debata.

 

Taingot ma gomos di ayat 14 “ai nunga gabe partohap di Kristus i hita, anggo gomos tatiop ro di ujungna pos ni roha, na di hita mula nai”. Nunga patar be holong ni roha ni Debata di ganup angka na porsea, sude do angka na porsea di Jesus Kristus mangomo ima surgo hasonangan i, Debata do na mambahen hita partohap di asi ni roha i, ndang alani parulaon ta manang alani gogonta i, alai holan asi ni roha na do i. Alani asa unang gabe mago haluaon na saleleng ni leleng na i sian hita, tapeop ma gomos hata ni Debata, tahangoluhon ma i, jala gabe toho ma hita marparange na ture, jala sada do na hinirim ni Debata tu hita, naeng nian ngolunta on gabe tau pasu pasu maradophon angka dongan, ingkon do boi hita manogu nogu angka na gale, paingothon angka na lilu, jala marsihaholongan sama hita, ai tangkas do didok di ayat 13 asa marsiapoan nian hita ganup ari, unang be masa angka late ni roha di hita, jala unang be masa angka parbada badaon, alai tapatarida ma parange na imbaru asa i parhitean ta laho manogu angka na gale jala na lilu. Alani hot ma hita di bagasan haporseaon na togu jala tahatindangkon ma angka na sintong taringot tu Jesus Kristus i, jala tatogu ma nang angka na gale marhite holong  na sian Debata.

Dipasu pasu Tuhan  Debata ma hita saluhutna. Amen.